Ástæðan fyrir ríflega 300 prósent aukningu á innflutningi til Íslands frá Ísrael, er að skýrast. Þrjú af fjórum gagnaverum á landinu harðneita að vera í viðskiptum við Ísrael.
Í maí sagði Mannlíf frá gríðarlegri aukningu á innflutningi frá Ísrael til Íslands frá því að Ísrael hóf þjóðarmorð sitt á Gaza, eftir mannskæða árás Hamas-liða í Ísrael 7. október 2023. Árið 2024 rauk innflutningurinn frá Ísrael til Íslands upp og fór í 3.353 milljarða króna.
Samkvæmt Hagstofu Íslands útskýrist aukningin að mestu á umfangsmiklum innflutningi á tölvuvörum hjá fyrirtækjum sem reka gagnaver hér á landi.
Mannlíf hafði samband við Umhverfis-, orku- og loftslagsráðuneytið til að fá upplýsingar um gagnaver á Íslandi. Í skriflegu svari sem þaðan barst segir að þrjú gagnaver séu skráð með starfsemi hér á landi en að gagnaver séu þó ekki rekstrarleyfisskyld. „Gagnaver eru ekki rekstrarleyfisskyld starfsemi og því er ekki til tæmandi opinber skrá yfir þá aðila. Samkvæmt upplýsingum ráðuneytisins eru þrjú gagnaver á Íslandi, atNorth, Borealis Data Center og Verne Global.“
Ráðuneytið benti aukreitis á að nú sé í bígerð gagnaver í Ölfusi á vegum AI Green Cloud en til stendur að opna það á næsta ári.
Mannlíf hafði samband við öll fjögur gagnaverin en þrjú þeirra svöruðu fyrirspurnum Mannlífs á þann hátt að fyrirtækin væru ekki í neinum viðskiptum við Ísrael. Ekkert svar barst hins vegar frá Verne Global, þrátt fyrir ítrekun.
RÚV sagði frá því í dag að ofurtölva hollenska tæknifyrirtækisins Nebius hafi verið valinn staður í hjá gagnaveri Verne í Keflavík. Athygli vekur að einn af eigendum Nebius er rússneskur ólígarki að nafni Arkady Yuryevich Volozh en hann er af gyðingaættum og hefur búið í Ísrael frá árinu 2014.
Athugasemdir