Ítalskt safn hefur sett af stað leit að ólíklegustu lögbrjótum, tveimur klaufalegum miðaldra ferðamönnum, sem næstum eyðilögðu listaverk á meðan þau voru að taka ljósmyndir.
Myndbandsupptaka sem Palazzo Maffei birti sýnir parið taka myndir hvor af öðrum þar sem þau þykjast sitja í kristalþöktum stól, verk eftir listamanninn Nicola Bolla, sem safnið lýsir sem „mjög viðkvæmu“ listaverki.
Á meðan konan beygir niður án þess þó að virðast snerta stólinn, sem kallast Van Gogh’s Chair og er þakinn Swarovski kristöllum, er karlmaðurinn ekki eins varkár, hann sest og dettur svo aftur á bak þegar stóllinn gefur sig undan þyngd hans.
Sést svo til parsins flýja úr herberginu, í myndbandi sem varð gríðarlega vinsælt um helgina.
Palazzo Maffei lýsti atvikinu sem „martröð allra safna“ og sagði við AFP í dag að kæra hefði verið lögð fram hjá lögreglu, án þess þó að tilgreina hvenær það hafi verið gert.
Safnið birti færslu á samfélagsmiðlum á fimmtudag þar sem segir að atvikið hafi átt sér stað fyrir innan við fjórum vikum og að stóllinn hafi síðan verið lagfærður.
„Þetta var heimskulegt að gera,“ sagði Bolla við ítalska tímaritið Fanpage. En listamaðurinn bætti því við að hann sæi einnig „jákvæða hlið“ á málinu. „Þetta er eins og einhvers konar gjörningur. Venjulegt fólk getur gert þetta líka, ekki bara listamenn.“
Athugasemdir