Konur, kvár og stöku karlar dönsuðu og sungu saman á Kvennavökunni í Hljómskálagarðinum í tilefni kvenréttindadagsins 19. júní síðastliðinn, sem Kvennaár 2025 stóð á bak við.
Margar þekktar listakonur stigu á svið, en þar voru Bríet, Reykjavíkurdætur, Heimilstónar, Countess Malaise, Mammaðín og Guðrún Árný. Kynnar voru Sandra Barilli og Sindri „Sparkle“ sem héldu uppi stemmningunni hjá tónleikagestum þrátt fyrir rigningu.
Guðrún Árný lokaði tónleikunum með því að stýra hópsöng með þekktum lögum eftir konur. Tónleikagestir tóku vel undir og sungu hátt með henni. Guðrún skoraði á skipuleggjendur Þjóðhátíðar í Eyjum að ráða sig, eða aðra konu, til að stýra brekkusöngnum svo hinn helmingur þjóðarinnar fengi að syngja í tónhæð sem henti þeim.
Þegar karlar stýra brekkusöng velja þeir lög og tóntegund sem hentar þeim sem verður til þess að konur eiga erfiðara með að syngja með, lýsir Guðrún Árný í samtali við Mannlíf. Hún segir það skipta máli að fá fjölbreytt tónlistarfólk til þess að stýra hópsöng upp á stemninguna. „Stelpur eru svo háværar þegar við syngjum á réttum stað,“ segir Guðrún Árný en tekur fram að hún vilji alls ekki taka sviðið frá Magnúsi Kjartani sem hún segir hafa stýrt brekkusöngnum mjög vel undanfarin ár. Heimurinn tapi hins vegar ekki af meiri fjölbreytni.
„Ég vil ekki vera valin því ég er kona, ég vil vera valin því ég er ógeðslega góð í því sem ég geri,“ segir Guðrún Árný í samtali við Mannlíf. Hún hefur margra ára reynslu af því að stýra hópsöng og á ýmsum hátíðum og skemmtunum. Guðrún Árný var fengin til að spila á föstudagskvöldi á Þjóðhátíð árið 2022 eftir ákall margra á samfélagsmiðlum um að hún fengi að stýra brekkusöngnum. Hins vegar hefur hún ekki verið fengin til að snúa aftur á stóra sviðið í Dalnum.
Athugasemdir