Málsmeðferðartími aðila sem eru að hefja veitingarekstur styttur umtalsvert

Jóhann Pall Jóhanns­son umhverfis-, orku- og lofts­lags­ráð­herra, und­ir­rit­aði nýverið breyt­ingu á reglu­gerð um skrán­ing­ar­skyldan atvinnu­rekstur og er hér um að ræða breyt­ingu á reglu­gerð um skrán­ing­ar­skyldan atvinnu­rekstur sam­kvæmt lögum um holl­ustu­hætti og meng­un­ar­varnir, nr. 830/2022.

Hefur breyt­ing þessi þegar tekið gildi og nú hefur verið opnað fyrir skrán­ingu á Ísland.is.

Með þess­ari reglu­gerð­ar­breyt­ing­unni er Jóhann Páll und­ir­rit­aði þann 20. júní síð­ast­lið­inn, mun rekstur veit­inga­staða verða skrán­ing­ar­skyldur í stað þess að gerð sé krafa um starfs­leyfi á grund­velli laga um holl­ustu­hætti og meng­un­ar­varnir. Og þannig er máls­með­ferð­ar­tími stjórn­valda styttur umtals­vert.

Það kemur fram á vef Stjórn­ar­ráðs­ins að til­lögur að starfs­leyfi á grund­velli laga um holl­ustu­hætti og meng­un­ar­varnir eru aug­lýstar til umsagnar í fjórar vikur, og í kjöl­farið hafa heil­brigð­is­nefndir fjög­urra vikna frest til að taka ákvörðun og skila grein­ar­gerð þar sem tekin er afstaða til athuga­semda er ber­ast.

Þessar kröfur eru ekki fyrir hendi þegar atvinnu­starf­semi er skrán­ing­ar­skyld og er þannig máls­með­ferð­ar­tími aðila sem eru að hefja veit­inga­rekstur hjá stjórn­völdum styttur umtals­vert með þeirri breyt­ingu sem nú verður.

Ekki skal þó slakað að neinu leyti á kröfum um heil­brigði, umhverfi eða öryggi almenn­ings, enda gildi að öðru leyti sömu lög­bundnu kröfur og áður.

Samræmd starfs­skil­yrði fyrir veit­inga­staði hafa verið upp­færð og er nú hægt að sækja um skrán­ingu þeirrar starf­semi í skrán­ing­ar­gátt á Ísland.is þar sem hlekkur fyrir almenna skrán­ingu er valin.

Stjórn­völd hafa nú hraðað þess­ari inn­leið­ingu breyt­inga eins og kostur er, en fyrr í mán­uð­inum, þann 6. júní, gerði ráð­herra jafn­framt breyt­ingu á reglu­gerð um holl­ustu­hætti, nr. 903/2024. Bætti inn ákvæði um að breyt­ing á hand­hafa starfs­leyfis krefj­ist ekki aug­lýs­ingar ef engar breyt­ingar hafa orðið á starfs­leyf­is­skil­yrðum.

Segir ráð­herra að ljóst sé að fyr­ir­hug­aðar séu „enn frek­ari breyt­ingar á reglu­verki þannig að fleiri flokkar atvinnu­rekstrar verði skrán­ing­ar­skyldir í stað þess að gerð sé krafa um starfs­leyfi.“

Jóhann Páll bendir á að það standi yfir vinna við end­ur­skoðun fyr­ir­komu­lags eft­ir­lits með holl­ustu­háttum og meng­un­ar­vörnum:

„Rík­is­stjórn Kristrúnar Frosta­dóttur vinnur hörðum höndum að því að vinda ofan af íþyngj­andi reglu­verki sem lagt hefur verið á fólk og fyr­ir­tæki á und­an­förnum árum,“ segir hann og bætir því við að þessar ein­földu reglu­gerð­ar­breyt­ingar séu það sem hann getur gert strax í sínu ráðu­neyti til að létta á stjórn­sýslu- og reglu­byrði fyr­ir­tækja í veit­inga­rekstri:

„Með þessu er það mín von að það verði auð­veld­ara og fljót­legra að opna veit­inga­staði á Íslandi,“ segir Jóhann Páll og bendir á að það sé verið að vinna að stærri breyt­ingum á fyr­ir­komu­lagi eft­ir­lits með holl­ustu­háttum og meng­un­ar­vörnum, en jafn­framt sé ljóst að stjórn­völd þurfi að tryggja skil­virka fram­kvæmd reglna um skrán­ing­ar­skyldan atvinnu­rekstur og huga sér­stak­lega að sam­spili þeirra reglna og laga­bálka sem um starf­sem­ina gilda:

„Stjórn­völd mega aldrei reisa stjórn­sýslu­legar hindr­anir að ósekju. Verkefni okkar er að setja skýrar og fyr­ir­sjá­an­legar reglur og tryggja skil­virka og snurðu­lausa fram­kvæmd þeirra. Þannig verjum við atvinnu­frelsið og ýtum undir vöxt og verð­mæta­sköpun.“