Íbúar í Costa Teguise á Lanzarote-eyju á Kanaríeyjum eru slegnir eftir atvik þar sem köttur varð fyrir alvarlegum brunasárum, líklega eftir að hafa verið úðað yfir hann sjóðandi vökva.
Atvikið átti sér stað 25. júní í íbúðarkjarna sem nú er að mestu leigður út til ferðamanna.
Samkvæmt heimildum frá heimamanni tilheyrir kötturinn litlum hópi sem hefur lifað friðsamlega í hverfinu í meira en áratug. „Þeir voru fleiri áður, en nú eru aðeins fjórir eftir. Þeir eru allir geldir, vingjarnlegir og fá góða umönnun frá bæði nágrönnum og ferðamönnum,“ sagði viðkomandi.
Talið er að eigandi eða leigjandi íbúðar í kjarnanum hafi ráðist viljandi á dýrið til að fæla það burt, vegna óánægju með nærveru kattanna. „Einhver tók málin í eigin hendur og kastaði einhverju mjög heitu yfir köttinn, líklega til að hræða hann burt,“ bætti heimildarmaðurinn við.
Eftir að kötturinn fannst illa slasaður og greinilega kvalinn, flutti annar nágranni hann tafarlaust til dýralæknis. Þar fékk hann bráða læknisaðstoð og gekkst m.a. undir aðgerð. Kötturinn er nú á batavegi. Sá sem flutti dýrið til læknis greiddi reikninginn, sem er áætlaður um 1.000 evrur.
„Þessir kettir eru spakir og mannelskir. Þeir búa kannski ekki inni hjá neinum, en þeir eru hluti af samfélaginu og fá ást og umhyggju. Það er hrottalegt að einhver skuli sýna þeim svona grimmd,“ sagði íbúinn.
Eigendasamtök húsanna hafa nú verið upplýst um málið og taka það alvarlega. Reiknað er með að lögreglumál verði gert úr því. „Þetta er ekki bara siðferðislega ámælisvert, þetta er glæpur. Samkvæmt spænskum hegningarlögum flokkast þetta sem dýraníð og sá sem ber ábyrgð verður að sæta ábyrgð fyrir þessa miskunnarlausu framkomu,“ sagði íbúinn að lokum.
Canary Weekly sagði frá málinu.
Athugasemdir