Dómsmálaráðherra hefur lagt fram áform í Samráðsgátt stjórnvalda um lögfestingu stafrænnar málsmeðferðar hjá sýslumönnum og dómstólum, í málum sem varða erfðalög, lög um aðför og lög um nauðungarsölu.
Segir í tilkynningu frá dómsmálaráðuneytinu að markmiðið með breytingunum sé að einfalda og bæta þjónustu, tryggja skilvirkari afgreiðslu mála og styðja við stefnu stjórnvalda um stafræna þjónustu.
Með frumvarpinu er jafnframt stigið skref til að tryggja jafnara aðgengi að opinberri þjónustu, óháð búsetu og stefnt er að því að tryggja rétt almennings til rafrænnar og stafrænnar málsmeðferðar hjá sýslumönnum og dómstólum:
„Við viljum tryggja að almenningur fái einfaldari, hraðari og öruggari afgreiðslu sinna mála. Með þessum breytingum stígum við markvisst skref í átt að skilvirkari opinberri þjónustu og mætum þörfum landsmanna, hvar sem þeir búa,“ segir Þorbjörg S. Gunnlaugsdóttir, dómsmálaráðherra. og bætir því við að mikil og hröð tækniþróun hafi átt sér stað á sviði stafrænna lausna innan stjórnsýslunnar undanfarin ár:
„Þau lög sem frumvarpið snýr að hafa ekki fylgt þessari miklu tækniþróun og mæta ekki þörfum almennings fyrir skilvirka og einfalda málsmeðferð“ segir hún og nefnir að frá árinu 2020 hafi verið í gildi „bráðabirgðaheimildir sem heimila rafræna málsmeðferð vegna skipta á dánarbúum“ og segir hún að þessi úrræði hafi reynst vel og „skilað betri, skilvirkari og hagkvæmari afgreiðslu mála“ en þær heimildir falla úr gildi í upphafi næsta árs; er því brýnt að festa þær í sessi til frambúðar til að forðast afturför“ segir ráðherra og bendir að lokum á að áformin megi nálgast í Samráðsgátt stjórnvalda og að umsagnarfrestur sé til og með 31. júlí næstkomandi.
Athugasemdir