Paul Gallagher, bróðir Liam og Noel Gallagher úr hljómsveitinni Oasis, hefur verið ákærður fyrir nauðgun. Málið er hluti af rannsókn sem hófst á síðasta ári.
Auk nauðgunar er hinn 59 ára gamli Paul einnig ákærður fyrir kynferðislega áreitni, nauðungarstjórnun og að hafa hótað lífláti. Hann á að koma fyrir dóm þann 27. ágúst næstkomandi.
Paul, sem býr í Lundúnum, er ári eldri en Noel og sjö árum eldri en Liam. Hann ólst upp með frægum bræðrum sínum, sem eiga að koma fram með Oasis á tónleikum í Wembley á miðvikudag. Paul hafði þó ekkert með hljómsveitina að gera og starfaði í staðinn sem ljósmyndari og plötusnúður.
Í samtali við dagblaðið The Mirror staðfesti talsmaður lögreglunnar í Lundúnum ákærurnar
„Karlmaður hefur verið ákærður fyrir fjölda brota – þar á meðal nauðgun, nauðungarstjórnun og kynferðislega áreitni.
Paul Gallagher, 59 ára, með lögheimili við Manor Park Road, East Finchley, hefur verið ákærður fyrir framangreind brot, þrjú brot vegna kynferðislegrar áreitni, þrjú brot fyrir vísvitandi kyrkingu, tvö brot fyrir hótanir um líflát og líkamsárás sem veldur líkamstjóni.“
Brotin eru talin hafa átt sér stað á árunum 2022 til 2024 og ákærurnar koma í kjölfar rannsóknar sem hófst á árinu 2024. Konan sem kærði málið fær aðstoð sérþjálfaðra lögregluþjóna.
Athugasemdir