Saxafónleikarinn og skólastjóri Tónskóla Árbæjar, Stefán S. Stefánsson, varð vitni að hræðilegum atburði á Tenerife, þar sem hann er nú í fríi.
Stefán lýsir átakanlegum atburði sem átti sér stað á Playa del Bobo í dag, þegar líflaus maður var dreginn upp úr sjónum fyrir framan fjölda strandgesta.
„Ég eins og svo margir aðrir íslendingar nýt þess í botn að vera á Tenerife. Dagurinn í dag var ekki einn af þeim,“ skrifar Stefán á Facebook rétt í þessu. Hann segir að hann og eiginkona hans, Anna Steinunn Ólafsdóttir, hafi verið í sólbaði í flæðarmálinu þegar hún benti honum á að eitthvað væri að gerast.
Hann lýsir hvernig lífvörður stökk út í sjóinn og dró líflausan mann á land. Strax hófust lífgunartilraunir í flæðarmálinu og fleiri aðilar komu að aðstoðinni, aðrir lífverðir, lögreglumenn og síðar sjúkraflutningamenn.
„Allt kom fyrir ekki, þrátt fyrir hetjulega baráttu lækna, bráðaliða og annarra sem komu að, lést maðurinn,“ segir Stefán og bætir við að örvinglaðir aðstandendur hafi ráfað um á meðan baráttan stóð yfir.
Hann lýsir því sem „súrrealísku ástandi“ þegar líkið lá í hvítum poka á ströndinni í heila þrjá klukkutíma. „Innan um börn með skóflur og bolta, nýir gestir á ströndinni sem horfðu á þetta hvíta fyrirbæri. Ströndin smám saman skiptist, ákveðinn radíus utan um líkið og svo aðrir hlutar strandarinnar.“
Um klukkan fimm mætti loks útfararþjónusta sem flutti líkið í svartan líkpoka og tók það af ströndinni. Á meðan líkið var borið burt sigldi skemmtibátur framhjá og skipstjórinn hrópaði:
„This is Tenerife ya-all! Count your blessings!“
Stefán endar færsluna á að hann muni gera einmitt það.
Athugasemdir