María Björk Guðmundsdóttir langaði alltaf í hund en þegar hún var að alast upp vildu foreldrar hennar ekki eiga gæludýr, í dag á hún 28 husky hunda. María deildi sögu sinni á dögunum í færslu í Facebook hópnum Hundasamfélagið.
„Við hjónin eignuðumst okkar fyrsta hund, fyrir hreina tilviljun, árið 2011. Við vorum í 1. maí göngu og hittum vinafólk sem spurði hvort við vildum koma og sjá hvolpa hjá þeim. Og það varð ekki aftur snúið, við féllum fyrir bláu augunum hennar Ösku okkar og urðum stoltir hundaeigendur,“ skrifar María Björk.
Hjónin María og Gunnar kynntust hundasleðasportinu á Íslandi eftir að fá fyrsta husky hundinn sinn, Ösku en vissu að þau gætu ekki tekið þátt með aðeins einn hund. Því leið ekki langt á að þau fengu sér annan husky sem þau nefndu Eldur og nokkru seinna bættist Reykur við.
„Einhverjir hvolpar urðu nú til úr þessu og til að gera mjög langa sögu stutta þá var staðan þannig að í ársbyrjun 2019 bjuggum við í tvíbýlishúsi á Akureyri með 3 börn, 2 ketti, 5 fullorðna husky hunda og 2 hvolpa!“ skrifar María en þau fluttu í kjölfarið í sveitina, í Glæsibæ við Akureyri. „Við fundum svo draumahúsið okkar úti í sveit, bættum við okkur hundum og höfum einnig verið með 4 got. Eigum í dag 28 hunda og rekum tvö fyrirtæki tengd hundunum okkar,“ skrifar María.
María og Gunnar stofnuðu ferðaþjónustufyrirtækið goHusky sem býður upp á hundasleðaferðir á veturna, göngu- eða hjólaferðir með hundana á sumrin og hunda klapp allan ársins hring. GoHusky hefur slegið í gegn á Instagram en þar eru þau með 210 þúsund fylgjendur sem fylgjast með daglegu lífi hjónanna og 28 hundum þeirra.
Þau hjónin vöktu athygli fyrir fáeinum vikum á Vor í Vaglaskógi tónleikunum en þar voru þau að spinna og prjóna úr husky hárum. Husky hundar fara mikið úr hárum og hjónunum þótti agalegt að henda því öllu. Gunnar fór því á námskeið og lærði að spinna ull á rokki sem María prjónar ýmislegt úr. Á býlinu þeirra í Glæsibæ geta gestir keypt húfur, eyrnaskjól og fleira úr husky hárum.
„Við fáum mikið af krökkum til okkar í heimsókn sem eru í sömu stöðu og ég, þau mega ekki eiga hund. Og ég segi öllum það sama, haltu áfram að láta þig dreyma, einn daginn rætast draumarnir,“ segir María Björk Guðmundsdóttir.
Athugasemdir