Telur sig hafa fundið klósettpappír í súpunni

Und­ar­legur aðskota­hlutur í til­bú­inni súpu hefur verið til umræðu á Facbeook frá því í gær.

Margrét Sigríður Jóhanns­dóttir birti færslu inni á Facebook-hópnum Mat­ar­tips! sem vakið hefur sterk við­brögð.

Margrét birti þar ljós­myndir af því sem hún segir hafa verið kló­sett­pappír, en hugs­an­lega hand­þurrka, sem hún hafi fundið í Mexíkóskri kjúklinga­súpu sem seld er undir vöru­merki Krón­unnar.

SúpanKló­sett­pappír eða hand­þurrka?

Mynd: Facebook

„Ég var að hræra í kjúklinga­súpu, setti hálfan pela af rjóma útí og smakk­aði til.. dró svo þennan dýr­indis kló­sett­pappír uppúr súp­unni og ekk­ert smá magn af honum,“ skrif­aði Margrét við mynd­ina. „Er búin að vera að kúg­ast síðan. Hafa fleiri lent í þessu með súpur frá Krónunni? Kvöld­mat­ur­inn fór svo sann­ar­lega í vaskinn þetta kvöldið.“

Við­brögðin létu ekki á sér standa og þótti mörgum ef ekki öllum þetta afar ógeð­fellt. Sagði Margrét sjálf í einni athuga­semd­inni að hugs­an­lega gæti þetta hafa verið hand­þurrka, en að það sé þó nógu slæmt.

Í sam­tali við Mannlíf sagð­ist Margrét hafa kúg­ast fram á kvöld vegna atviks­ins.

„Við höfðum strax sam­band við Krónuna og sendum þeim tölvu­póst með myndum. Ég missti mat­ar­lyst­ina og kúg­að­ist rest­ina af kvöld­inu við til­hugs­un­ina um að ég hafi smakkað súp­una.“

Sagði hún að Krónan hefði brugð­ist strax við ábend­ing­unni. „Krónan brást strax við og tók þetta alvar­lega, sóttu pakkn­ing­una til mín í morgun og þetta er komið inn á borð til gæða­eft­ir­lits Krón­unnar.“

Að lokum segir Margrét að hún vilji að málið verði rann­sakað til að koma í veg fyrir að hið sama hendi annað fólk

„Ég vil að þetta sé rann­sakað svo annað fólk lendi ekki í þessu. Þeir ætla að rann­saka málið hvað hefur geta ollið þessu. Þetta er leið­indar atvik og á ekki að geta gerst þegar um mat­væli er að ræða.“

Mannlíf hafði sam­band við gæða- og ferla­stjóra Krón­unnar í morgun, sem kvaðst ekki kann­ast við málið, en ætl­aði að kanna það betur og bað um að hringt yrði í sig aftur síðar. Ekki hafa enn feng­ist upp­lýs­ingar um málið frá Krónunni.

Uppfært:

Krónan harmar atvikið og segir að um mann­leg mis­tök sé að ræða við pökkun.

Hér má lesa skrif­legt svar frá Krónunni:

„Okkur hjá Krónunni þykir mjög miður að umrætt atvik hafi átt sér stað en um er að ræða mann­leg mis­tök við pökkun hjá fram­leið­anda. Við gerum fast­lega ráð fyrir að um ein­angrað til­vik sé að ræða en til að taka af allan vafa og gæta fyllsta öryggis er inn­köll­un­ar­ferli hafið á þessu lotu­núm­eri.

Við leggjum mikla áherslu á öryggi og gæði og tökum þetta mjög alvar­lega. Fram­leið­andi mun yfir­fara og upp­færa ferla með starfs­fólki sínu til að koma í veg fyrir að slíkt end­ur­taki sig. Við höfum verið í sam­skiptum við við­kom­andi við­skipta­vin og þökkum honum kær­lega fyrir ábend­ing­una. Við biðjum við­skipta­vini okkar inni­lega afsök­unar á þeim óþæg­indum sem þetta kann að hafa valdið.“