Ung stúlka lést eftir að hafa veikst á Emerge Festival-tónlistarhátíðinni sem haldin var í Belfast á Norður-Írlandi á sunnudagskvöld.
Lögreglan í Norður-Írlandi (PSNI) greindi frá því að stúlkan, sem var á táningsaldri, hafi verið flutt á sjúkrahús eftir að hún fékk bráð veikindi á hátíðinni en lést síðar af völdum þeirra.
Samkvæmt yfirlýsingu lögreglu veiktust fleiri á hátíðinni: kona á þrítugsaldri og drengur á táningsaldri. Konan er í alvarlegu en stöðugu ástandi á sjúkrahúsi en drengurinn hefur fengið meðferð og er búist við að hann nái fullum bata.
„Lögregla fór á vettvang vegna andláts ungrar stúlku á táningsaldri sunnudaginn 24. ágúst. Hún lést á sjúkrahúsi eftir að hafa orðið veik á viðburði í suðurhluta Belfast. Auk þess eru tvö önnur tilvik til rannsóknar þar sem fólk veiktist á sama viðburði,“ sagði í yfirlýsingu frá PSNI.
Þetta er ekki fyrsta dauðsfallið á tónlistarhátíð í Bretlandi í sumar. Í júní lést 21 árs gamall maður eftir að hafa sótt Margate Drum & Bass Festival á Dreamland svæðinu í Kent. Hátíðinni var lokað fyrr vegna mikils hita, en hitinn þar fór í 28 gráður þann 28. júní.
Síðar kom í ljós að sjúkratilfelli hafði verið tilkynnt á svæðinu og að maðurinn hafi verið fluttur á Queen Elizabeth The Queen Mother-sjúkrahúsið þar sem hann lést. Þingmaður í héraðinu sagði í yfirlýsingu til sveitarstjórnar að þrátt fyrir að læknaráðgjafar hefðu samþykkt læknisþjónustu á hátíðinni myndi lögreglan rannsaka málið ítarlega.
Athugasemdir