Hópur sérfræðinga á vegum Sameinuðu þjóðanna hvatti í dag Alþjóðaknattspyrnusambandið FIFA og Knattspyrnusamband Evrópu UEFA til að setja Ísrael í keppnisbann vegna ásakana um þjóðarmorð á Gaza-strönd.
„Íþróttir verða að hafna þeirri hugmynd að allt geti gengið sinn vanagang,“ sögðu átta óháðir sérfræðingar í yfirlýsingu.
„Landslið ríkja sem fremja gróf mannréttindabrot geta og eiga að vera sett í bann.“
Sérfræðingarnir, sem starfa samkvæmt umboði Mannréttindaráðs SÞ en tala ekki fyrir hönd stofnunarinnar sjálfrar, sögðu að bann við þátttöku Ísraels væri „nauðsynlegt svar til að bregðast við áframhaldandi þjóðarmorði“.
Ummælin koma viku eftir að sjálfstæð rannsóknarnefnd SÞ (COI), sem einnig talar ekki fyrir hönd stofnunarinnar, lýsti því yfir að „þjóðarmorð sé í gangi í Gaza“ og að Ísrael bæri ábyrgð.
Ísrael, sem hóf stríð sitt á Gaza eftir mannskæða árás Hamas inn í Ísrael 7. október 2023, hefur hafnað þessum ásökunum.
Sérfræðingarnir sögðu að ríki sem hýsa alþjóðastofnanir og íþróttamót þar sem Ísrael tekur þátt mættu ekki „halda hlutleysi í skjóli þjóðarmorðs“.
Þeir lögðu áherslu á að krafan væri um að sniðganga „ríkið Ísrael en ekki einstaka leikmenn“.
„Það á ekki að mismuna eða beita refsiaðgerðum gegn leikmönnum vegna uppruna eða þjóðernis,“ sögðu sérfræðingarnir. Meðal þeirra eru Francesca Albanese, sérstakur skýrslugjafi SÞ um réttindi á herteknu svæðum Palestínu, og fulltrúar vinnuhóps SÞ um viðskipti og mannréttindi.
Í síðustu viku, á viðburði sem Amnesty International stóð fyrir í London, fordæmdi fyrrverandi knattspyrnustjarnan Eric Cantona það sem hann kallaði „tvískinnung“ sem Ísrael nyti.
„Fjórum dögum eftir að Rússland hóf stríðið í Úkraínu settu FIFA og UEFA Rússland í bann,“ sagði hann.
„Nú eru liðnir 716 dagar af því sem Amnesty International hefur kallað þjóðarmorð, en samt er Ísrael enn leyft að taka þátt,“ bætti hann við.
„FIFA og UEFA verða að víkja Ísrael úr keppni. Knattspyrnufélög alls staðar verða að neita að keppa við ísraelsk lið,“ sagði hann.
Athugasemdir