Halloween er rétt handan við hornið og flestir vita að það er ekki góð hugmynd að klæða sig upp sem nasisti, nema einn maður frá Georgíufylki sem þurfti að læra þá lexíu á erfiðan hátt.
Í myndbandi sem tekið var í gærkvöldi má sjá mann í búningi sem líkir eftir leynilöggu þýsku Gestapo, með stórt bjórglas í hendinni, fyrir utan bar í háskólabænum Athens í Georgíu.
Eins og sjá má eru aðrir viðstaddir mjög reiðir yfir búningnum, enda hakakrossinn vel sýnilegur á honum.
Ein kona gengur að honum, öskrar að hann eigi að hypja sig og ýtir við honum. Maðurinn bregst við með brosi og segir henni að snerta sig ekki.
Aðrir mynda hring í kringum manninn og öskra á hann, þar til hann verður ofbeldisfullur, rífur upp bjórglasið og slær konuna í höfuðið með því. Heimildir herma að konan hafi fengið glóðarauga, nefbrot og nokkur spor saumuð.
Fulltrúi lögreglunnar í Athens-Clarke-sýslu segir við TMZ að þeir viti af atvikinu þar sem maður var handtekinn fyrir bæði alvarlega líkamsárás og einfalda líkamsárás.
Talsmaðurinn vildi hvorki staðfesta né neita því að þetta væri sami maðurinn og klæddur var nasistabúningnum á myndbandinu, svo nafn mannsins hefur ekki verið gefið upp í fjölmiðlum Vestanhafs.
Athugasemdir