Þriggja ára stúlka lést eftir að hafa fallið í sundlaug á Rhodos

Þriggja ára bresk stúlka sem féll í sund­laug á hót­eli í Grikk­landi og var sögð hafa verið skilin eftir án eft­ir­lits í fríi, er látin eftir 12 daga sjúkra­hús­legu.

Harm­leik­ur­inn átti sér stað í sjáv­ar­þorp­inu Lardos á eyj­unni Rhodos þann 14. októ­ber. Stúlkan, sem aðeins er nefnt Matilda, var í fríi með fjöl­skyldu sinni. Hún lést á sjúkra­húsi á Englandi á sunnu­dag, eftir að hafa verið í lífs­hættu á sjúkra­húsum á Rhodos og Krít áður en hún var flutt með sjúkra­flugi til heima­lands­ins.

Stúlkan fannst með­vit­und­ar­laus á botni sund­laugar á hót­el­inu eftir að 44 ára gam­all frændi hennar, sem hafði verið ábyrgur fyrir umsjón hennar, á að hafa yfir­gefið hana í um það bil tíu mín­útur.

Breskur læknir sem var á staðnum stökk út í laug­ina til að bjarga barn­inu og hóf end­ur­lífgun þar til sjúkra­flutn­inga­menn komu á vett­vang. Matilda var flutt á hér­aðs­sjúkra­húsið á Rhodos þar sem hún var sett í önd­un­ar­vél, síðan flutt til Krítar og að lokum til Bret­lands, þar sem hún lést.

Frændi hennar og 54 ára ferða­skrif­stofu­stjóri sem hafði umsjón með gestum hót­els­ins hafa verið hand­teknir af lög­reglu. Þeir, ásamt 57 ára eig­anda hót­els­ins og fram­kvæmda­stjóra þess, standa nú frammi fyrir ákærum vegna dauða barns­ins.

Rannsókn á vett­vangi leiddi í ljós að örygg­is­ráð­staf­anir á hót­el­inu voru í lág­marki. Enginn sund­laug­ar­vörður var á vakt, ekk­ert björg­un­ar­tæki við laug­ina og eng­inn eft­ir­lits­að­ili til staðar, sam­kvæmt fréttum.

Lögmaður frænda barns­ins, Antonis Zervos, hefur haldið því fram að skjól­stæð­ingur hans hafi „hvorki séð né verið nálægt barn­inu“. Lögmaður hót­el­stjór­ans sagði á móti að laugin væri það lítil að sam­kvæmt lögum þyrfti ekki að hafa sund­laug­ar­vörð á vakt.

Lögregla hefur farið yfir upp­tökur úr örygg­is­mynda­vélum til að skýra atvik máls­ins. Samkvæmt yfir­völdum stendur rann­sókn enn yfir. Kona sem lá á sól­bekk við laug­ina tók fyrst eftir barn­inu, dró það upp úr vatn­inu og kall­aði á hjálp.

Læknar sögðu fjöl­skyld­unni strax fyrstu dag­ana að heila­skemmdir barns­ins væru óaft­ur­kræfar. Michalis Sokor­elos, for­stöðu­maður sjúkra­húss­ins, sagði stúlk­una vera „heila­dauða“. Hann bætti við: „Barnið hefur aug­ljós­lega verið lengi í vatn­inu. Það sýnir engin við­brögð.“