Karlmaður réðist á starfsmann Nettó í gærkvöldi en var snúinn niður af viðskiptavinum.
Sagt var frá því á hverfagrúppunni Norðurbærinn minn - íbúar í Norðurbæ í Hafnarfirði, að ráðist hafi verið á starfsmann Nettó í Miðvangi í Hafnarfirði um klukkan 21 í gærkvöldi. Manneskjan sem skrifaði færsluna, hrósar viðskiptavini sem hélt árásarmanninum niðri áður en lögreglan kom á vettvang. Þá gagnrýndi færsluhöfundurinn laka öryggisgæslu verslunarinnar.
„Ef sá sem var í Nettó núna um 21 leitið og náði að halda niðri einstaklingi sem réðst a starfsmann búðarinnar er hér inni þá langar mig að segja þér að þú ert algjör hetja! Það voru þarna börn og fullorðnir sem urðu mjög skelkuð. Ég vill ekki hugsa það til enda ef þú hefðir ekki verið þarna.
Eins vill ég koma á framfæri til Nettó að öryggisgæsla er algjört lágmark eftir að búðin fór að vera opin til 00.00. Það tók lögregluna rúmlega 10 mínútur að koma á vettvang.
Þetta hefði getað endað mjög illa.
Takk takk takk fyrir þitt afrek í kvöld.“
Samkvæmt heimildum Mannlífs er talið að kynþáttahatur sé rótin af árásinni en árásarmaðurinn hafði komið fyrr um daginn inn í Nettó og tekið tvo sígarettupakka með sér út úr versluninni án þess að greiða fyrir þá. Starfsmaður Nettó, sem er dökkur á hörund, hljóp á eftir manninum og spurði hvað hann væri að hugsa. Maðurinn hreytti þá í starfsmanninn ónotum, sagði honum að hypja sig heim til sín, þetta væri hans landið hans og viðhafði rasísk ummæli.
Seinna um kvöldið, um klukkan 21:00, mætti sami maður aftur í verslunina og tók þar drykk ófrjálsri hendi. Þegar sami starfsmaður reyndi að stöðva hann, réðist maðurinn á hann. Það varð starfsmanninum til happs að tveir viðskiptavinir Nettó stukku til og héldu manninum niðri þar til lögreglan mætti á vettvang og fjarlægði árásarmanninn. Starfsmaðurinn hlaut ekki alvarleg meiðsl af árásinni.
Hvorki náðist í lögregluna, né Nettó við gerð fréttarinnar.
Athugasemdir