„Við erum sem sagt að fara að taka gullið!“

Stefán Pálsson vill stilla vænt­ingum Íslend­inga gagn­vart EM í hand­bolta í botn.

Evr­ópu­mót karla í hand­bolta er hafið en „strák­arnir okkar“ keppa sinn fyrsta leik klukkan 17:00 í dag, þegar þeir mæta Ítölum. Íslend­ingar hafa oft fallið í þá gryfju að stilla vænt­ingar sínar of hátt þegar landar þeirra keppa á erlendri grundu og vilja sumir meina að betra sé að tóna niður vænt­ing­arnar. Sagn­fræð­ing­ur­inn Stefán Pálsson er þó ekki einn af þeim.

Stefán PálssonStefán er þekktur spaug­ari

Mynd: YouTube/Skjáskot

Í Facebook-færslu sem Stefán birti í dag segir hann ein­hverja Facebook-vina hans hvetja til „hóf­stilltra vænt­inga“ fyrir EM en telur það mis­skiln­ing. Ástæðuna segir hann vera þá að þegar stór­mót er haldið í hinum kalda og dimma jan­úar, sé best að stilla vænt­ingum í efstu hæðir. Hér má lesa hina spaugi­legu færslu sagn­fræð­ing­ins.

„Ég sé að ein­hverjir FB-vinir eru að reyna að hvetja til hóf­stilltra vænt­inga fyrir þetta hand­bolta­mót. Það er full­kom­inn mis­skiln­ingur. Snilldin við stór­mót í hand­bolta í jan­úar er einmitt sú að þá er ekk­ert annað við að vera og allt er kalt og dimmt. Það að skrúfa vænt­ing­arnar upp í hæstu hæðir er nákvæm­lega jafn nauð­syn­legt og ákveða fyrir Júró­visjón að lík­lega munum við vinna og hafa áhyggjur af því hvort Laug­ar­dals­höllin sé nógu stór. - Við erum sem sagt að fara að taka gullið!“