Óvenjulega jarðskjálftamerkið sem mældist við Mount Teide á Tenerife í gær kom aftur fram í fyrrinótt, að því er fram kemur í tilkynningu frá Involcán, eldfjallafræðistofnun Kanaríeyja.
Stofnunin leggur áherslu á að þrátt fyrir aukna jarðskjálftavirkni á Tenerife, þar sem yfir 260 smáskjálftar hafa greinst frá 7. febrúar, sé ekki um að ræða auknar líkur á eldgosi til skamms eða meðal langs tíma.
Jarðskjálftamerkið, sem greindist fyrst á þriðjudag í nágrenni Teide, var fordæmalaust á Tenerife hvað varðar lengd og samfellu. Svipað merki mældist aftur snemma morguns daginn eftir, þó með minni styrk og styttri tímalengd.
Samkvæmt Involcán tengjast bæði tilvikin þrýstingsbreytingum og hreyfingu jarðhitavökva djúpt undir yfirborði jarðar. Slík ferli séu þekkt á svæðinu og hafi valdið sambærilegri virkni áður.
Lágtíðnimerkið sem skráð var 10. febrúar, og stóð yfir í rúma klukkustund, leiddi til þess að boðað var til aukafundar vísindanefndar eldfjallavarnaáætlunar Kanaríeyja, Pevolca.
Upptök merkjanna eru talin vera á sama svæði og skjálftahrinan sem hefur staðið yfir í suðvesturhluta Las Cañadas del Teide-eldgígsins frá 7. febrúar. Skjálftarnir hafa verið smávægilegir, flestir á átta til tólf kílómetra dýpi, og enginn þeirra hefur náð meira en 1,7 á Richter-kvarðanum.
Þótt enn sé unnið að frekari greiningu telja vísindamenn líklegast að skjálftahrinan tengist flæði og uppsöfnun jarðhitavökva neðanjarðar. Sambærileg ferli hafi einnig komið fram í öðrum vöktunargögnum, meðal annars í auknu losunarmagni koldíoxíðs í Teide-gígnum, sem hefur verið mælt frá árinu 2016.
Involcán ítrekar að Tenerife sé virkt eldfjallakerfi, eins og söguleg eldgos sýna, en að núverandi virkni bendi ekki til yfirvofandi goss. Samt sem áður sýni mælingar að eldfjallakerfið undir eyjunni sé enn virkt og ekki merki um að virkni hafi dvínað að svo stöddu.
Athugasemdir