Framboð Spencer Pratt til borgarstjóra í Los Angeles nýtur vissulega athygli og stuðnings, en ekki innan fjölskyldunnar. Systir hans, Stephanie Pratt, hefur opinberlega varað kjósendur við því að kjósa bróður sinn.
Stephanie birti færslur á samfélagsmiðlum á laugardag þar sem hún gagnrýndi metnað Spencers í stjórnmálum. Hún viðurkennir að hann hafi lagt sitt af mörkum fyrir samfélagið í Pacific Palisades, en telur hann ekki hæfan til að stjórna stórborg með um fjórar milljónir íbúa.
Hún heldur því fram að framboðið sé fyrst og fremst markaðsbragð til að auka sölu á endurminningabók hans, The Guy You Loved to Hate: Confessions from a Reality TV Villain, og hvetur fólk til að íhuga hvernig hann myndi ráðstafa skattfé borgarbúa ef hann kæmist til valda.
Stephanie segir jafnframt að hún hafi áhyggjur af stöðu borgarinnar og beinir spjótum sínum einnig að núverandi borgarstjóra, Karen Bass, sem hún kallar „ASSBASS“ í einni færslu. Hún leggur þó áherslu á að Los Angeles þurfi ekki „annan óhæfan og reynslulausan borgarstjóra“ og skrifar: „atkvæði með honum er atkvæði með heimsku“.
Spencer tilkynnti framboð sitt í síðasta mánuði og hefur einkum gagnrýnt stjórnvöld fyrir viðbrögð við eldsvoðanum í Pacific Palisades, þar sem heimili hans brann ásamt fjölda annarra bygginga.
Í samtali við TMZ á kosningaviðburði í síðustu viku sagðist Spencer sannfærður um að hann gæti sigrað Karen Bass. Hann hefur kallað hana „Karen Basura“ [rusl á spænsku] og haldið því fram að hún muni enda í fangelsi fyrir meinta réttvísishindrun. Málflutningur hans hefur vakið athygli fyrir að minna á aðferðir og orðræðu Donalds Trump.
Athugasemdir