„Nokkrar“ bandarískar orrustuþotur hafa hrapað yfir Kúveit, að því er her landsins staðfesti.
Í yfirlýsingu sem varnarmálaráðuneyti Kúveits birti á X kom fram að fleiri en ein flugvél hefði lent í slysinu. „Viðeigandi yfirvöld hófu tafarlaust leit og björgun, þar sem áhafnir voru fluttar á sjúkrahús til heilsufarsmats og nauðsynlegrar læknisaðstoðar. Ástand þeirra er stöðugt,“ segir í tilkynningunni.
Myndbönd sem birtust á netinu sýna herþotu falla í logum til jarðar og greining CNN á upptökunum bendir til þess að um F-15E Strike Eagle, tvíhreyfla orrustuþotu, hafi verið að ræða. Annað myndband virðist sýna flugmann skjóta sér í fallhlíf.
Þrátt fyrir að þeir sem tengdust slysinu hafi lifað af, hafa að minnsta kosti þrír bandarískir hermenn fallið í tengslum við áframhaldandi árásir á Íran. Donald Trump hefur varað við því að sú tala gæti „aukist töluvert“.
Trump hefur jafnframt látið í ljós að átökin við Íran gætu staðið næstu fjórar vikur, samkvæmt Daily Mail. „Þetta hefur alltaf verið fjögurra vikna ferli. Við gerðum ráð fyrir að þetta tæki um fjórar vikur, eða skemur,“ er haft eftir Trump.
Hann sagði blaðinu að hann væri enn opinn fyrir frekari viðræðum við Írana, en gæti ekki sagt til um hvort þær yrðu „bráðlega“. „Ég veit það ekki,“ sagði Trump. „Þeir vilja tala, en ég sagði að þeir hefðu átt að gera það í síðustu viku, ekki þessa.“
Talsmaður varnarmálaráðuneytis Kúveits bætti við að „bein samvinna hafi verið við bandarísku herliðssveitirnar vegna atviksins og gripið til sameiginlegra tæknilegra ráðstafana“.
Málið er nú til rannsóknar til að skýra orsök slyssins og munu yfirvöld í Kúveit kalla eftir upplýsingum frá opinberum aðilum. Ekki var tekið fram nákvæmlega hvar áreksturinn átti sér stað né hvert flugvélarnar voru að fara, en líklegt er að þær hafi verið staðsettar á Ali Al Salem-flugstöðinni í Kúveit, um 37 kílómetra frá landamærum Írak. Staðsetningargögn úr myndbandi á netinu benda til þess að slysið hafi orðið um 10 kílómetra frá stöðinni, að sögn CNN.
Á flugstöðinni er varanleg bandarísk viðvera með 386. loftherdeildinni, þar á meðal fjölda F-15E orrustuþota. F-15E Strike Eagle var hönnuð á níunda áratugnum fyrir langdræga, hraða loftyfirburði án fylgdar eða rafræns hernaðarstuðnings. Þoturnar gegndu lykilhlutverki í fyrra Persaflóastríðinu við að hrekja hersveitir Saddams Husseins frá Kúveit og hafa verið staðsettar í landinu síðan.
Athugasemdir