Vladimir Pútín Rússlandsforseti fékk hóstakast sem náðist á myndbandi sem síðar var fjarlægt af Telegram-rás Kremlar.
Í klipptu atriði úr upptöku sem gerð var fyrir ávarp í tilefni alþjóðlegs baráttudags kvenna sést forsetinn hreinsa hálsinn áður en hann byrjar að hósta ítrekað og bendir að hálsinum.
Samkvæmt Moscow Times sagði Pútín í myndbandinu
„Vitið þið, leyfið mér að segja þetta aftur, því… hálsinn á mér er svolítið ertur. Já, svolítið ertur. Ég var næstum farinn að hósta. Ég hef verið að tala mikið í dag.“
Myndbandið af hinum 73 ára rússneska leiðtoga var birt á Telegram-rás Kremlar en síðar fjarlægt án skýringa, að því er The Times greinir frá. Í kjölfarið var birt ný útgáfa frá fjölmiðladeild forsetaembættisins þar sem hóstakastið var ekki lengur sjáanlegt.
Pútín hélt síðar ávarp í tilefni alþjóðlegs baráttudags kvenna, sem hefur sérstaka sögulega þýðingu í Rússlandi þar sem dagurinn varð eitt af upphafsatriðum byltingarinnar árið 1917.
„Örlát, samúðarfull og sannarlega vitur kvenleg sál gerir heiminn betri og hlýrri, og ást móður lifir í hjarta hvers manns alla ævi,“ sagði Pútín í ræðu sinni.
Alexander Yushanev, blaðamaður sem fylgir Kreml fyrir hönd fjölmiðla, gerði lítið úr atvikinu og kallaði það „helgarmistök“.
„Samkvæmt mínum upplýsingum fer engin sérstök rannsókn fram innan forsetaskrifstofunnar vegna óklippts myndbands af kveðju Pútíns sem birtist á netinu,“ sagði hann.
Hann bætti við:
„Þetta eru einfaldlega helgarmistök sem geta komið fyrir hvern sem er. Og þetta er ekki í fyrsta skipti sem slíkt gerist hjá Kreml. Enn eru það raunverulegt fólk sem vinnur þar, ekki gervigreind.“
Yushanev spurði jafnframt hvort fólk hefði virkilega haldið að öll myndbönd væru tekin upp í einni tilraun eða að maður gæti ekki þurft að hreinsa hálsinn eftir nær þriggja mínútna ræðu.
Úkraínski blaðamaðurinn Denys Kazansky velti hins vegar upp þeirri kenningu að myndbandinu hafi vísvitandi verið lekið.
Samkvæmt The Telegraph sagði hann að það gæti verið vegna þess að „allir eru orðnir þreyttir á þessum veikburða og ellihruma gamla manni“.
Heilsa Pútíns hefur áður verið til umræðu og ýmsar óstaðfestar fullyrðingar hafa á undanförnum árum gengið um að hann þjáist meðal annars af Parkinsonsjúkdómi, krabbameini, hjartaveikindum eða taugahrörnun.
Sir Richard Dearlove, fyrrverandi yfirmaður bresku leyniþjónustunnar MI6, sagði árið 2024 að hann teldi mögulegt að Pútín væri með Parkinson.
„Ég hef ekki skýrt svar við því, en ég á tengiliði og vini í Austur-Evrópu sem telja að eitthvað sé verulega að honum heilsufarslega,“ sagði Dearlove þá í viðtali við LBC. „En ég er ekki læknir.“
Athugasemdir