Kona á fertugsaldri slasaðist illa eftir að lausagönguhundur réðst að henni og hundi hennar á göngustíg í Árbæ á laugardagskvöld. Hún greinir frá atvikinu í færslu í Facebook-hópnum Árbærinn í kvöld.
Atvikið átti sér stað 14. mars á göngustíg nálægt Krónunni. Samkvæmt frásögn konunnar hljóp Schäfer-hundur að þeim og réðst til atlögu.
„Kæri Schäfer eigandi sem varst með fallega hundinn þinn í lausagöngu á laugardagskvöldið síðasta 14 mars á göngustígnum rétt hjá Krónunni. Ég er úti að labba með minn hund og hundurinn þinn tekur á rás og hleypur okkur niður og er með kamb á sér og reynir að fara í hundinn minn og að þú hafir ekki gert NEITT er til skammar!!“ skrifar hún.
Konan segir eiganda hundsins ekki hafa gripið inn í heldur haldið áfram göngu sinni. „Þú hélst áfram að labba og reykja sígarettuna þína á meðan hundurinn þinn var búinn að valda stór skaða!“ segir í færslunni.
Hundur konunnar slapp að mestu ómeiddur, en hún sjálf hlaut alvarlega áverka. Hún segist hafa brotið fjögur rifbein og fengið gat á milta. „Sem betur fer slapp hundurinn minn ágætlega frá þessu en eftir ligg ég með 4 brotin rifbein og gat á milltanu!“ skrifar hún.
Konan þurfti að leita sér læknisaðstoðar og eyddi kvöldinu og næsta degi á sjúkrahúsi. Hún er nú undir eftirliti eftir rannsóknir. „Sem betur fer slapp ég við aðgerð en þarf að vera í eftirliti,“ segir hún.
Í lok færslunnar skorar hún á eiganda hundsins að hafa samband, þó hún segist efast um að svo verði. „Ég vona að þú hafir samvisku til að hafa samband við mig en ég stórlega efa það miða við ábyrgðarleysið í þér.“
Athugasemdir