Sjúkrahúsið Tallahassee Memorial Healthcare í Flórída hefur höfðað mál gegn konu sem hefur neitað að yfirgefa sjúkrastofu sína frá því hún var útskrifuð í október á síðasta ári.
Í kærunni kemur fram að konan hafi haldið áfram að dvelja í herberginu þrátt fyrir að ekki hafi lengur verið talin þörf á bráðameðferð. Sjúkrahúsið hefur farið fram á að dómari fyrirskipi henni að yfirgefa herbergið og að sýslumaður geti gripið inn í ef þörf krefur.
Að sögn sjúkrahússins hefur dvöl konunnar haft áhrif á starfsemina þar sem hún hindrar að rúmið sé notað fyrir aðra sjúklinga. „Áframhaldandi dvöl stefndu kemur í veg fyrir að rúmið sé notað fyrir sjúklinga sem þurfa bráðameðferð,“ segir í kærunni.
Konan var upphaflega lögð inn til meðferðar en formleg útskrift var gefin út 6. október eftir að læknar töldu að hún þyrfti ekki lengur á sjúkrahúsþjónustu að halda. Samkvæmt málsókninni hefur sjúkrahúsið ítrekað reynt að skipuleggja brottför hennar, meðal annars í samvinnu við fjölskyldu og með því að bjóða henni aðstoð við að nálgast nauðsynleg skilríki.
Lögmaður sjúkrahússins vildi ekki tjá sig um málið við fjölmiðla og talsmaður sagði ekki hægt að ræða einstök mál sem eru til meðferðar fyrir dómi. Ekki kemur fram í kærunni fyrir hvaða veikindum konan var meðhöndluð, né hversu hár reikningur hennar er, eða hvernig hún gat dvalið á sjúkrahúsinu í meira en fimm mánuði eftir útskrift.
Konan er ekki með lögmann og sér sjálf um málsvörn sína. Ekki náðist í hana í síma og enginn svaraði þegar reynt var að hringja í herbergi hennar á sjúkrahúsinu.
Réttarhöld í málinu eru fyrirhuguð síðar í þessum mánuði.
Samkvæmt bandarískum lögum þurfa sjúkrahús sem fá greiðslur úr opinberum tryggingakerfum að veita einstaklingum með bráð veikindi nauðsynlega meðferð, óháð greiðslugetu. Þegar sjúklingur er talinn stöðugur og getur fengið frekari meðferð utan sjúkrahúss er heimilt að útskrifa hann, að því gefnu að honum sé tryggt viðeigandi eftirfylgni.
Athugasemdir