Fjölskylda Nancy Guthrie hefur sent frá sér yfirlýsingu tæpum tveimur mánuðum eftir að hún hvarf og biðlar á ný til almennings um aðstoð.
Börn hennar, Savannah Guthrie, Annie og Camron Guthrie, ásamt mökum sínum, birtu yfirlýsinguna á laugardagskvöld í tengslum við sérstaka umfjöllun KVOA, Bring Her Home: The Disappearance of Nancy Guthrie. Þar þakka þau samfélaginu í Tucson fyrir stuðninginn hingað til.
Fjölskyldan segir að íbúar svæðisins gætu haft lykilupplýsingar sem leiði til lausnar málsins og hvetur fólk til að rifja upp allt sem það kann að hafa séð eða vitað. Lögð er áhersla á að engin smáatriði séu of lítil.
Í yfirlýsingunni segir meðal annars:
„Við söknum mömmu okkar með hverjum andardrætti og við fáum engan frið fyrr en hún er komin heim. Við getum ekki syrgt, við getum aðeins fundið til sársauka og velt vöngum. Við einbeitum okkur eingöngu að því að finna hana og koma henni heim.“
Fjölskyldan viðurkennir jafnframt að hún óttist að Nancy sé látin, en segir að hún þurfi svör til að geta fengið lokun.
Nancy sást síðast 31. janúar eftir að hafa verið hjá dóttur sinni í Tucson í Arizona. Lögregla og alríkislögreglan FBI hafa unnið saman að rannsókninni, en engar haldbærar vísbendingar hafa enn komið fram.
Myndefni úr dyrabjöllumyndavél við heimili hennar sýnir mann með grímu standa fyrir utan húsið og reyna að hylja myndavélina. Lögregla hefur handtekið nokkra aðila undanfarnar vikur, en öllum hefur verið sleppt að skömmum tíma liðnum.
Athugasemdir