Átján ára piltur, Tristan Thomas Roberts, hefur verið dæmdur í lífstíðarfangelsi fyrir að myrða móður sína, Angelu Jane Shellis, 45 ára, með hamri. Lík hennar fannst í gróðri við göngustíg nærri Morfa-friðlandinu í Wales, 24. október á síðasta ári.
Roberts, sem er frá Prestatyn, játaði verknaðinn fyrir dómi. Dánarorsök Shellis var alvarlegir höfuðáverkar af völdum bareflis. Hún starfaði sem stuðningsfulltrúi í Rhyl High School.
Hann bjó með móður sinni þegar árásin átti sér stað og var handtekinn sama dag og lík hennar fannst. Lögregla sagði hann hafa fljótt fengið stöðu grunaðs og var hann handtekinn á heimili sínu, en fjórum dögum síðar var hann ákærður fyrir morð.
Fyrir morðið hafði Roberts birt ofbeldisfull og kvenhatandi skilaboð á netinu, meðal annars á Discord.
Upptökur frá kvöldinu sýna að hann leiddi móður sína um hverfi og yfir járnbrautarteina áður en þau komu á afvikinn stað. Þar bað hann hana að setjast á bekk og hóf að tala með amerískum hreim. Hún varð hrædd og bað hann að drepa sig ekki, en hann dró þá fram hamar og er talið að hann hafi slegið hana með honum fjórum sinnum.
Í hljóðupptökum sem hann sjálfur tók heyrist hann segja að hann sé feginn að þessu sé lokið og að hann hafi drepið hana.
Fjölskylda og vinir lýstu Shellis sem hlýlegri og glaðværri manneskju sem hafði lagt sig fram í starfi sínu. „Hún var aðeins 45 ára og svo yndisleg og glaðlynd, elskuð af öllum sem kynntust henni,“ sagði systir hennar.
Fékk ráð frá gervigreind
Dómstóllinn fékk að heyra að Roberts hefði skipulagt morðið í að minnsta kosti þrjár vikur. Hann keypti hamra, hnífa og hlífðarbúnað á netinu og eyddi miklum tíma í að skoða morð á netinu.
Árásin hófst um klukkan 23 og stóð fram til klukkan 3:30 um nóttina. Hann tók hana upp og geymdi upptökur sem þóttu of átakanlegar til að spila fyrir dómi. Á meðan árásinni stóð var móðirin með meðvitund og bað hann ítrekað um að hringja í neyðarlínuna.
Hann dró lík hennar um 100 metra og skildi það eftir í gróðri, áður en hann sendi skilaboð í hennar nafni til að láta líta út fyrir að hún væri enn á lífi.
Í færslum á Discord hafði hann sagst ætla að drepa móður sína til að ná „hefnd og réttlæti“ og talaði um morð í anda kvikmyndarinnar American Psycho. Hann leitaði jafnframt ráða hjá gervigreind um hvernig mætti hreinsa blóð og hvort betra væri að nota hamar eða hníf.
Krufning sýndi að hún hafði fengið um sex högg í höfuðið auk áverka sem bentu til kyrkingar.
Sonur hennar og bróðir Tristans, Ethan Roberts, sagði missinn „óbærilegan“ og lýsti mikilli sorg og reiði. Hann sagðist vera reiður út í bróður sinn, en einnig út í sjálfan sig fyrir að hafa ekki verið á staðnum til að koma í veg fyrir þetta. Hann sagði: „Ég er aðeins skugginn af sjálfum mér. Mikilvægasta manneskjan í lífi mínu er nú farin. Mamma var alltaf til staðar fyrir mig, sama hvað.“
Verjandi Roberts vísaði til þess að hann væri aðeins 18 ára, með greiningar um einhverfu og ADHD og hefði átt erfiða æsku. Þá hefðu komið fram einkenni geðrofs og versnandi andlegs ástands.
Dómarinn sagði málið „afar óvenjulegt“ og benti á að Roberts hefði sýnt „hreina grimmd“, notið stjórnunarinnar og hunsað bænir móður sinnar um hjálp. Hann taldi að andleg vandamál drægju ekki úr ábyrgð hans.
Roberts var dæmdur í lífstíðarfangelsi með lágmarksdóm 22 ár og sex mánuði, sem lækkar lítillega vegna gæsluvarðhalds. Að þeim tíma liðnum verður metið hvort hann fái reynslulausn, en hann verður undir eftirliti það sem eftir er ævinnar.
Athugasemdir