Blaðamaðurinn Mohammed Wishah, sem starfaði fyrir Al Jazeera Mubasher á Gaza, var drepinn í ísraelskri drónaárás á Gasasvæðinu í gær.
Wishah lést í gær þegar árás var gerð á bíl sem hann var í á al-Rashid-stræti, strandvegi vestan við Gaza-borg.
Samkvæmt heimildum Al Jazeera kviknaði í bílnum eftir loftárásina.
Í frétt Al Jazeera segir að Ísrael hafi beint árásum að blaðamönnum á Gaza frá upphafi stríðsins í október 2023. Upplýsingaskrifstofa stjórnvalda á Gaza segir að að minnsta kosti 262 blaðamenn hafi fallið í árásum Ísraels síðan þá.
Í yfirlýsingu frá Al Jazeera Media Network segir að „harðlega sé fordæmd þessi hryllilega árás og dráp á Mohammed Wishah, fréttamanni Al Jazeera Mubasher“.
„Þetta er nýtt og augljóst brot á alþjóðalögum og viðmiðum og endurspeglar áframhaldandi kerfisbundna stefnu um að ráðast gegn blaðamönnum og þagga niður í sannleikanum,“ segir jafnframt.
Þá segir að dauði Wishah hafi ekki verið tilviljun heldur markviss árás sem hafi átt að ógna blaðamönnum og hindra þá í störfum sínum.
Fréttamaður Al Jazeera í Gaza-borg, Ibrahim al-Khalili, segir að það að Wishah hafi verið drepinn á aðalvegi borgarinnar sýni að ástandið fari versnandi, sérstaklega í ljósi áframhaldandi brota Ísraels á vopnahléinu.
Athugasemdir