Faðir og ungabarn hans lifðu af eftir að þau féllu bæði niður á lestarteina á lestarstöð í Bangladess þegar lest var að leggja af stað. Faðirinn lagðist yfir barnið og skýldi því með líkama sínum á meðan átta vagnar fóru yfir þau.
Fjölskyldan hafði ferðast frá Brahmanbaria til Bhairab með Titas-úthverfalestinni. Samkvæmt bangladíska miðlinum Daily Sun kom lestin á stöðina um eina og hálfa klukkustund á eftir áætlun. Þegar lestin fór aftur af stað reyndi faðirinn að stíga út með barnið í fanginu, en það rann úr höndum hans og féll niður í þröngt bilið milli lestarinnar og brúnar brautarpallsins.
Faðirinn brást strax við. Hann stökk niður á teinana, tók barnið í fangið, þrýsti sér flötum upp að veggnum við pallinn og hélt sér þar á meðan átta vagnar lestarinnar fóru beint yfir þau. Bæði sluppu án alvarlegra meiðsla.
Vitni fylgdust skelfingu lostin með atvikinu án þess að geta gripið inn í í tæka tíð.
Starfsmaður í lestinni sagði að fjölskyldan hefði verið að reyna að fara út úr lestinni á meðan hún var þegar farin af stað. Hann staðfesti að faðirinn hefði brugðist tafarlaust við, haldið barninu fast og lagst upp að veggnum, sem hafi bjargað þeim þegar lestin fór framhjá.
Á meðan að þessu stóð aðstoðuðu aðrir farþegar móður barnsins við að komast örugglega út úr lestinni.
Eftir að lestin fór framhjá hlupu viðstaddir að og klöppuðu fyrir föðurnum fyrir skjót og yfirveguð viðbrögð hans.
Myndband af atvikinu hefur síðan farið víða á samfélagsmiðlum og margir hafa hrósað föðurnum fyrir hugrekki og yfirvegun. Sumir hafa jafnvel kallað hann hetju.
Athugasemdir