Mannréttindasamtökin Adalah Center for Human Rights greindu frá því í yfirlýsingu í gær að lögmaðurinn Hadeel Abu Saleh hefði heimsótt aðgerðasinnana Thiago Avila og Saif Abu Koshk í Shikma-varðhaldsmiðstöðinni, eftir að þeir voru handteknir þegar Ísrael stöðvaði flota hjálparskipa á alþjóðlegum hafsvæðum.
Samtökin segja að mennirnir hafi verið í hungurverkfalli í sex daga til að mótmæla því sem þau kalla ólöglega handtöku þeirra í tengslum við mannúðaraðgerð sem ætlað var að rjúfa hafnbannið á Gaza-svæðinu.
Samkvæmt Adalah sagði Avila að hann hefði sætt ítrekuðum yfirheyrslum sem stæðu í allt að átta klukkustundir í senn. Þá hafi þeir sem sjá um yfirheyrslurnar hótað honum því að hann yrði annað hvort „drepinn“ eða dæmdur í „100 ára fangelsi“.
Einangrun og svefnsvipting
Samtökin segja að báðir mennirnir séu í einangrun og að ljós sé stöðugt haft kveikt í klefum þeirra allan sólarhringinn, sem sé þekkt aðferð til að valda svefnleysi og truflun á skynjun.
Avila sagði jafnframt að afar kalt sé í fangaklefunum.
Adalah heldur því einnig fram að mennirnir séu með bundið fyrir augun í hvert sinn sem þeir eru fluttir úr klefa sínum, þar á meðal við læknisskoðanir. Slík framkvæmd sé „alvarlegt brot á „siðareglum lækna“.
Mannúðarstarf gert refsivert
Að sögn samtakanna snerist stór hluti yfirheyrslna um Global Sumud-flotann, sem þau telja benda til þess að verið sé að gera mannúðarstarf og samstöðu með Gaza refsiverða.
Adalah ítrekar kröfu sína um „tafarlausa og skilyrðislausa lausn“ mannanna og kallar eftir því að hætt verði því sem samtökin lýsa sem ólöglegum varðhaldsaðferðum.
Lögmenn bíða nú eftir því að fá staðfest hvort ísraelsk yfirvöld hyggist fara fram á frekari framlengingu á gæsluvarðhaldi þeirra.
Athugasemdir