Nýlegt og afar huggulegt raðhús við Maríugötu 4 í Urriðaholti hefur verið sett á sölu. Um er að ræða einstaka eign á einni hæð með innbyggðum bílskúr, byggða árið 2022, þar sem áhersla hefur verið lögð á vandaða hönnun, gæði og tengingu við náttúrulegt umhverfi. Söluverð eignarinnar er 199 milljónir króna en það þykir vera í dýrari kantinum þegar kemur að raðhúsum á Íslandi
Húsið var hannað af arkitektinum Jóhanni Einarssyni. Rut Káradóttir sá um alla innanhússhönnun eignarinnar. Einkennist heimilið af fágaðri og hlýlegri hönnun þar sem efnisval og útfærsla mynda heilsteypta heild.
Eignin skiptist í anddyri, þrjú til fjögur svefnherbergi, tvö baðherbergi, opið og bjart stofu- og borðstofurými, rúmgott eldhús með búri, þvottahús og innbyggðan bílskúr með innangengi. Í dag er skipulagið þannig að tvö barnaherbergi eru í húsinu ásamt sjónvarpsherbergi og rúmgóðri hjónasvítu, en auðvelt er að breyta sjónvarpsherberginu í fjórða svefnherbergið.
Mikil lofthæð er í húsinu og stórir gluggar sem snúa út í bakgarðinn skapa bjarta og opna stemningu. Hljóðloft í alrými tryggir góða hljóðvist og stuðlar að þægilegu heimilislífi.
Sérsmíðaðar innréttingar frá Beyki prýða húsið og blöndunartæki ásamt gólfefnum eru frá Ebson. Í eldhúsinu eru heimilistæki úr Siemens Studio Line-línunni sem falla vel að nútímalegri hönnun rýmisins.
Á baklóðinni er stór verönd með heitum potti og útieldhúsi þar sem vel er hugað að útivist og samveru. Framan við húsið er einnig rúmgott hellulagt bílaplan og verönd.
Athugasemdir