Adam Driver hefur brugðist kaldhæðnislega við ásökunum frá Lenu Dunham um hegðun hans við tökur á sjónvarpsþáttunum Girls.
Í nýrri ævisögu sinni, Famesick, heldur Lena því fram að Driver hafi stundum sýnt „villimannslega“ hegðun á tökustað. Þegar Driver var spurður út í ummælin á blaðamannafundi á kvikmyndahátíðinni í Cannes vegna kvikmyndarinnar Paper Tiger svaraði hann:
„Ég hef enga athugasemd við neitt af þessu. Ég geymi þetta allt fyrir bókina mína.“
Svar hans vakti hlátur meðal viðstaddra samkvæmt Variety, en Dunham lýsir hegðun hans í bókinni sem langt frá því að vera fyndinni. Lýsti hún Driver sem hálfum manni og hálfri skepnu.
Hún rifjar meðal annars upp atvik þegar þau voru að æfa línur saman og segir Driver hafa misst stjórn á skapi sínu.
„Adam öskraði: „Segðu eitthvað fjandinn hafi það!“ og kastaði stól í vegginn við hliðina á mér,“ skrifar hún. Þá hafi hann einnig sagt við hana: „Vaknaðu andskotinn hafi það! Ég er orðinn þreyttur á að horfa á þig bara stara.“
Á þeim tíma segist Dunham hafa glímt við hugrofsástand tengt ógreindu legslímuflakki.
Hún fjallar einnig um tökur á kynlífssenum þeirra í þáttunum, þar sem þau léku parið Hannah Horvath og Adam Sackler. Samkvæmt Dunham hafi fyrirfram ákveðin uppsetning senanna oft farið út um gluggann þegar myndavélarnar fóru í gang.
Hún segir Driver í hlutverki sínu hafa hent sér til og frá í senunum og viðurkennir að hún hafi stundum óttast að atriðin færu of langt áður en hún stöðvaði upptökurnar.
„Hluti af mér var hræddur um að þegar ég sneri mér við myndi ég uppgötva að ég væri allt í einu stödd í klámmynd frá áttunda áratugnum með fullu samræði,“ viðurkenndi Lena. „En eftir nokkrar leiknar samfarahreyfingar kallaði ég stopp.“
Þrátt fyrir ásakanirnar rifjar Dunham upp að Driver hafi sagt sér þegar tökum lauk árið 2017 að hann myndi „alltaf elska“ hana, en að hún hafi aldrei heyrt frá honum aftur eftir það.
Driver hefur áður talað mjög jákvætt um samstarf sitt við Dunham. Í viðtali við Larry King árið 2017 sagði hann að vinnuumhverfið á þáttunum hefði verið eitt það besta sem hann hefði upplifað.
„Hún er mjög nákvæm í skrifum sínum og skapar opið rými þar sem allir geta prófað það sem þeir vilja,“ sagði hann þá um Dunham.
Athugasemdir