Tveir unglingspiltar skutu þrjá til bana í árás á stærstu mosku San Diego í gær, áður en þeir snéru byssunum að sjálfum sér.
Annar tveggja piltanna sem grunaðir eru um að hafa orðið þremur að bana í skotárás við stærstu mosku San Diego í gær, er sagður hafa verið 17 ára fyrrverandi glímukappi í framhaldsskóla.
Hinir grunuðu eru þeir Cain Clark, 17 ára, og Caleb Vazquez, 18 ára. Þeir fundust látnir inni í BMW-bifreið nærri moskunni og telur lögregla að þeir hafi svipt sig lífi.
Myndir af Clark hafa birst á samfélagsmiðlum þar sem hann sést með verðlaunapeninga úr glímukeppnum.
Lögregla segir hatursfull skilaboð hafa verið skrifuð á vopnin sem notuð voru í árásinni. Þá fannst haglabyssa með límmiða merktum „SS“ nærri vettvangi, sem talið er vísa til Schutzstaffel-sveita nasista í Þýskaland.
Meðal fórnarlamba árásarinnar var öryggisvörðurinn og átta barna faðirinn Amin Abdulla, sem hefur verið hylltur sem hetja fyrir að hafa „bjargað mannslífum“.
Samkvæmt NBC 7 hefur minningarkveðjum til Abdulla rignt inn á samfélagsmiðlum.
Lögreglustjórinn í San Diego, Scott Wahl, lýsti gjörðum Abdulla sem „hetjulegum“ og sagði að hann kynni að hafa bjargað mörgum mannslífum.
Clark hafði keppt í glímu fyrir Madison-menntaskólann tímabilið 2024–2025, þó hann hafi samkvæmt NBC ekki verið nemandi við skólann sjálfan. Talsmaður skólayfirvalda í San Diego sagði hann hafa stundað fjarnám og átt að útskrifast síðar í þessum mánuði.
Samkvæmt Samtökum um samskipti Bandaríkjamanna og íslams, bárust samtökunum 8.683 tilkynningar um andúð gegn múslimum á síðasta ári, sem er mesti fjöldi kvartana sem samtökin hafa skráð á einu ári frá því þau hófu starfsemi árið 1996.
Framkvæmdastjóri samtakanna í San Diego, Tazheen Nizam, fordæmdi árásina harðlega.
„Enginn ætti nokkurn tíma að óttast um öryggi sitt á meðan hann sækir bænir eða stundar nám í grunnskóla,“ sagði hún.
Borgarstjóri New Yor, Zohran Mamdani sagðist einnig vera „skelfingu lostinn“ vegna árásarinnar og hvatti Bandaríkjamenn til að sameinast gegn íslamófóbíu og „pólitík ótta og sundrungar“.
Þá kom fram að lögreglan í New York hefði aukið viðveru sína við moskur í borginni í kjölfar árásarinnar.
Athugasemdir