Kyle Andrew Tayag hefur verið dæmdur í tveggja ára fangelsi fyrir nauðgun sem átti sér stað í bifreið á bílastæði við Hraunslóð í Heiðmörk í maí 2022.
Tayag var sakfelldur fyrir að hafa, án samþykkis og með ólögmætri nauðung, þvingað unga konu til kynferðislegra athafna í bifreið sinni að kvöldi 13. maí 2022. Í dóminum kemur fram að hann hafi meðal annars snert brjóst hennar, þvingað hana til munnmaka, látið hana fróa sér og farið inn á buxur hennar þrátt fyrir ítrekuð mótmæli hennar og beiðnir um að hann hætti. Tayag alfarið sök í málinu og sagði hann ákæruna uppspuna.
Dómurinn byggir að verulegu leyti á framburði brotaþola sem dómari taldi trúverðugan og studdan gögnum málsins. Var Tayag sakfelldur fyrir alla háttsemina sem honum var gefin að sök að undanskildu því að hann hefði kysst brotaþola á munninn.
Við ákvörðun refsingar leit dómurinn til þess að um alvarlegt brot gegn kynfrelsi ungrar konu væri að ræða. Sérstaklega var vísað til þess að Tayag hefði sýnt einbeittan brotavilja með því að halda áfram háttsemi sinni þrátt fyrir skýr mótmæli brotaþola sem sagði ítrekað að hún vildi ekki taka þátt í kynferðislegum athöfnum og óskaði eftir að komast heim.
Á hinn bóginn var tekið tillit til þess að verulegur dráttur hefði orðið á meðferð málsins án þess að Tayag bæri ábyrgð á honum.
Refsing Tayag var ákveðin tveggja ára fangelsi. Fullnustu 21 mánaðar refsingarinnar var þó frestað skilorðsbundið til þriggja ára.
Þá var Tayag gert að greiða brotaþola tvær milljónir króna í miskabætur auk vaxta. Dómurinn taldi ljóst að brotið hefði valdið henni verulegri vanlíðan og vísaði meðal annars til sálfræðivottorðs þar sem fram kom að hún hefði glímt við áfallastreituröskun og sótt sér meðferð vegna afleiðinga brotsins.
Athugasemdir