Söngvarinn Caleb Shomo, forsprakki bandarísku rokkhljómsveitarinnar Beartooth, greindi frá því um helgina að hann væri samkynhneigður eftir meira en 14 ára hjónaband með eiginkonu sinni, Fleur Shomo.
Shomo birti yfirlýsingu á Instagram þar sem hann sagðist vilja segja sannleikann um persónulegt líf sitt eftir vangaveltur undanfarinna ára. Þar kvaðst hann hafa glímt við sjálfsmynd sína og kynhneigð í langan tíma, samhliða erfiðleikum tengdum áfengisneyslu.
Í færslunni sagði hann að edrúmennska hefði hjálpað sér að horfast í augu við tilfinningar sem hann hefði lengi bælt niður. Þá kom fram að væntanleg tónlist hans muni endurspegla nýjan kafla í lífi hans og að hann hyggist tjá sig af meiri hreinskilni en áður.
Eiginkona hans, Fleur Shomo, birti síðar eigin yfirlýsingu þar sem hún lýsti yfir stuðningi við eiginmann sinn þrátt fyrir að hjónaband þeirra væri á enda. Hún sagði að það hefði verið sársaukafullt að fylgjast með innri baráttu hans í gegnum árin og að aðstæðurnar hefðu reynst henni bæði ruglingslegar og erfiðar tilfinningalega.
Í færslunni sagðist hún þó áfram vilja „elska, vernda og styðja“ Caleb þrátt fyrir skilnaðinn. Hún rifjaði einnig upp samband þeirra með orðunum: „Sagan okkar var góð. Og nú er henni lokið.“
Parið gekk í hjónaband árið 2012 og eiga þau engin börn saman.
Athugasemdir