Átta nemendur lentu í óskemmtilegri lífsreynslu í gærkvöld þegar vettvangsferð þeirra í skemmtigarð í Galveston í Houston endaði nærri með ósköpum eftir að rússíbani sem þau voru í bilaði.
Slökkviliðsmenn voru kallaðir á staðinn í skemmtigarðinum Pleasure Pier þar sem nemendurnir sátu fastir hátt yfir jörðu. Björgunarmenn notuðu körfu á slökkvibíl til að ná fólkinu niður úr tækinu.
Myndir af vettvangi sýna nemendurna sitja og bíða á meðan björgunarmenn unnu að því að koma þeim til hjálpar. Það var í raun það eina sem þeir gátu gert eftir að hafa setið fastir í marga klukkutíma.
Nemendurnir festust í tækinu um klukkan 17:20 að staðartíma. Síðasti farþeginn var ekki kominn niður fyrr en um klukkan 21:00.
Samkvæmt Mike Varela yngri, slökkviliðsstjóra í Galveston, voru nemendurnir sýnilega skelkaðir eftir reynsluna.
Voru um 30 metra yfir jörðu
Allir átta farþegarnir voru skoðaðir af heilbrigðisstarfsfólki eftir björgunina vegna hættu á ofþornun. Niðurstaðan var sú að enginn þeirra hefði hlotið alvarleg meiðsli.
Höfðu þeir setið í nærri 30 metra hæð í nokkrar klukkustundir þegar björgunin fór fram.
Nemendurnir voru þátttakendur í vettvangsferð á vegum STEM Academy-gagnfræðiskólanum og STEM Academy-framhaldsskólanum.
Talsmaður Landry's Inc., sem rekur Pleasure Pier, sagði að bilun hefði orðið í tækinu.
Samkvæmt fyrirtækinu virkaði öryggiskerfi rússíbanans eins og til var ætlast og stöðvaði hann sjálfkrafa þegar bilunin kom upp.
Þrátt fyrir að allir hafi sloppið ómeiddir er líklegt að sumir úr hópnum bíði nokkuð með að fara aftur í rússíbana.
Athugasemdir