Landspítalinn eyddi sönnunargögnum sem lögreglan á höfuðborgarsvæðinu hafði óskað eftir fyrir rannsókn á máli en þetta kemur fram í dómi yfir Arturas Leimontas.
Leimontas var nýverið dæmdur í þriggja mánaða skilorðsbundið fangelsi fyrir kynferðislega áreitni gagnvart unglingsstúlku á bráðamóttöku Landspítalans í Fossvogi sumarið 2024.
Samkvæmt dóminum átti atvikið sér stað að kvöldi 15. júní 2024 þegar stúlkan hafði verið flutt á bráðamóttökuna í mjög ölvuðu og meðvitundarskertu ástandi. Vitni, meðal annars hjúkrunarfræðingar, sjúkraliðar og öryggisvörður, lýstu því fyrir dómi að Leimontas hefði kysst stúlkuna á munninn og sett fingur í munn hennar. Leimontas var á þeim tímapunkti sjúklingur á spítalnum.
Í dómnum kemur fram að lögreglan hafi sett sig í samband við Landspítalann fimm dögum eftir að málið kom upp til að fá upptökur úr öryggismyndavélum sem áttu að varpa betra ljósi á málsatvik. Í svari spítalans til lögreglu var því lofað að taka saman upptökur sem snéru að málinu. Lögreglan ítrekaði svo beiðni sína þann 26. júní vegna þess að spítalinn hafði ekki komið myndbandi til lögreglu. Þegar lögreglan sendi sína þriðju ítrekun, þann 3. september sama ár, kom í ljós að spítalinn hafði eytt upptökunum.
Athugasemdir