Lögreglan á höfuðborgarsvæðinu varar almenning við umfangsmikilli bylgju svikasímtala og smáskilaboða sem nú berast fjölda íslenskra símanúmera. Í skilaboðunum er því haldið fram að þau séu send frá umferðarlögreglunni og fólki bent á að smella á hlekk til að greiða meinta sekt.
Í yfirlýsingu frá lögreglu kemur fram að aldrei hafi borist jafn margar tilkynningar um netbrotatilraunir á jafn skömmum tíma. Er því talið að um mjög umfangsmikla svikaherferð sé að ræða.
Lögreglan hvetur fólk eindregið til að ýta ekki á hlekki sem berast með þessum hætti. Þá er almenningi ráðlagt að fara ávallt beint inn á opinberar og viðurkenndar vefsíður í stað þess að fylgja hlekkjum í skilaboðum.
Bent er á að sektir frá lögreglu birtist ávallt inni á island.is en ekki í gegnum smáskilaboð með greiðsluhlekkjum.
Þeir sem telja sig hafa orðið fyrir svikum eða tapað fjármunum vegna skilaboðanna eru hvattir til að hafa tafarlaust samband við sinn viðskiptabanka til að fá ráðgjöf og bregðast við mögulegu tjóni. Að því loknu er fólki ráðlagt að tilkynna málið til lögreglu.
Lögreglan minnir jafnframt á netbrotagáttina á island.is undir „Samfélag og réttindi“, þar sem hægt er að tilkynna bæði netbrot og tilraunir til slíkra brota.
Athugasemdir