Reykjavíkurborg er að leggja lokahönd á að koma skiptiskjólum fyrir á þremur stöðum í borginni. Skiptiskjól er vettvangur fyrir íbúa til að skiptast á nytjahlutum og styrkja hringrásarhagkerfið um leið.
Með þessu er verið að færa þjónustuna nær íbúum og styðja við mikilvægi þess að nýta hluti vel í stað þess að henda þeim eða kaupa nýtt.
Þarna geta öll fengið útrás fyrir sinn eigin búðarleik og það er um að gera að mæta á staðinn, skilja eitthvað eftir og gá hvað er í boði. Eins og fyrr segir er verið að leggja lokahönd á skýlin í dag og því á lagerinn eftir að byggjast upp.
Góðar viðtökur íbúa
Fyrsta skiptiskjólið var sett upp við Sundlaugaveg í fyrra. Þetta var tilraunaverkefni sem fékk góðar viðtökur íbúa og því var ákveðið að setja upp tvö ný skiptiskjól í sumar, eitt við Eiríksgötu og hitt við Sogaveg.
Hugmyndafræðin að baki verkefninu er sambærileg þeirri sem liggur að baki Fríbúðinni í Gerðubergi þar sem hægt er að skiptast á smærri nytjahlutum án greiðslu. Þess má geta að Fríbúðin er lokuð sem stendur vegna endurskipulagningar en verður opnuð á ný síðar í þessum mánuði.
Endurgert strætóskýli
Skiptiskjólin eru í öllum tilvikum við grenndarstöðvar og mun Sorpa hafa eftirlit með þeim eins og öðrum grenndarstöðvum á höfuðborgarsvæðinu. Skiptiskjólið sjálft er líka gott dæmi um hringrásarhagkerfið en þarna er endurgert strætóskýli á ferð en búið er að innrétta það með hillum.
Eins og hillurnar gefa til kynna er skiptiskjólið ætlað fyrir minni nytjahluti en ekki er ætlast til þess að það sé vettvangur fyrir skipti á fötum og bókum eða fyrir snyrtivörur, hnífa eða mat. Forsendur fyrir því að allt gangi vel upp er að ganga vel um skiptiskjólið og skilja aðeins eftir hreina og nothæfa hluti. Umgengnisreglur hanga uppi í öllum skiptiskjólunum.
Athugasemdir