Úlfur sem beit konu í verslunarmiðstöð í Hamborg í Þýskalandi í mars síðastliðnum er að öllum líkindum dauður, samkvæmt upplýsingum frá umhverfisyfirvöldum borgarinnar. Um var að ræða fyrsta skráða tilvikið í um þrjá áratugi þar sem villtur úlfur ræðst á mann í Þýskalandi eftir að tegundin sneri aftur til landsins.
Dýrið vakti mikla athygli þegar það beit 65 ára gamla konu í andlit eftir að hún reyndi að aðstoða það. Konan hafði séð úlfinn rekast á glugga verslunar og ætlaði sér að losa hann úr erfiðri stöðu þegar árásin átti sér stað. Hún hlaut minniháttar áverka á kinn og við munn.
Eftir atvikið var úlfurinn handsamaður og búinn staðsetningarsendi áður en honum var sleppt aftur út í náttúruna. Samkvæmt yfirvöldum yfirgaf hann Hamborg skömmu síðar og hélt til dreifbýls svæðis í meira en 150 kílómetra fjarlægð frá borginni.
Seint í maí hætti staðsetningarsendirinn hins vegar skyndilega að senda frá sér merki. Umhverfisyfirvöld telja ólíklegt að um tæknibilun eða að sendirinn hafi einfaldlega losnað af dýrinu. Sérfræðingar hafa leitað á svæðinu þar sem síðasta merkið barst en án árangurs.
Þýska ríkisútvarpið NDR hefur greint frá því að mögulegt sé að úlfurinn hafi verið skotinn, þó ekkert hafi verið staðfest um afdrif hans.
Úlfar hurfu nær alfarið úr Þýskalandi um miðja 19. öld vegna veiða og eyðingar búsvæða. Eftir sameiningu Þýskalands árið 1990 hófu úlfar frá Póllandi að nema þar land á ný. Samkvæmt opinberri talningu fundust 219 úlfahópar í landinu á síðasta ári.
Þýsk stjórnvöld samþykktu í desember lagabreytingu sem heimilar reglulegar veiðar á úlfum á þéttbýlum svæðum til að stýra stofnstærð þeirra.
Athugasemdir