Karlmaður hefur verið dæmdur í fjögurra og hálfs árs fangelsi af Héraðsdómi Reykjaness fyrir að hafa nauðgað tveimur konum árið 2023 en Vísir greindi frá málinu.
Í öðru málinu kom hann steinmunum fyrir í kynfærum og endaþarmi þolanda síns. Nafn mannsins hefur verið afmáð úr dóminum.
Fyrra brotið átti sér stað á gistiheimili í apríl 2023. Þar var maðurinn sakfelldur fyrir að hafa haft samræði og önnur kynferðismök við konu án samþykkis hennar, en hún gat ekki spornað við verknaðinum vegna áhrifa áfengis og svefndrunga. Fyrir dómi neitaði hann sök, en samskipti þeirra á milli voru meðal gagna málsins. Þar skrifaði hann meðal annars að hann hefði „gengið of langt“ og viðurkenndi jafnframt að hann hefði játað ef kæra hefði verið lögð fram.
Síðara brotið átti sér stað í október sama ár. Þolandi vaknaði sárþjáð eftir að hafa leyft manninum að gista hjá sér og kom þá í ljós að steinar höfðu verið settir í leggöng hennar og endaþarm. Maðurinn játaði hjá lögreglu að hafa framið verknaðinn, þótt hann deildi um lagalega flokkun hans.
Í dómi kemur fram að bæði brotin hafi beinst að konum í viðkvæmri stöðu og að maðurinn hafi verið meðvitaður um ástand þeirra. Auk fangelsisrefsingarinnar var honum gert að greiða hvorri konunni tvær milljónir króna í miskabætur auk alls sakarkostnaðar, samtals tæpar 5,5 milljónir króna.
Athugasemdir