Lögregla sinnti fjölbreyttum verkefnum á höfuðborgarsvæðinu í nótt og í gærkvöldi, þar á meðal innbrotum, líkamsárás, umferðarlagabrotum og útköllum vegna ölvaðra einstaklinga.
Tilkynnt var um innbrot í miðbæ Reykjavíkur þar sem greinileg merki voru um að brotist hefði verið inn. Málið er nú til rannsóknar hjá lögreglu. Þá voru tveir aðilar handteknir með stuttu millibili á sitthvorum staðnum, grunaðir um innbrot. Báðir voru vistaðir í fangaklefa í þágu rannsóknar mála þeirra.
Einnig var ökumaður handtekinn grunaður um akstur undir áhrifum fíkniefna. Honum var sleppt að lokinni blóðsýnatöku. Þá var annar einstaklingur handtekinn grunaður um líkamsárás. Sá var sagður mjög ölvaður og var vistaður í fangaklefa.
Lögregla hafði einnig afskipti af tveimur ökumönnum sem óku á meira en tvöföldum leyfilegum hámarkshraða. Báðir voru kærðir fyrir brotin og sviptir ökuréttindum til bráðabirgða.
Tilkynning barst um stolna bifreið í austurbænum, en hún fannst skömmu síðar í nágrenninu.
Meðal annarra verkefna lögreglu voru útkall vegna manna sem voru að rífast inni á skemmtistað í miðbænum, en samkvæmt vitnum var um orðaskak að ræða og ekki talin ástæða til frekari aðgerða. Þá var tilkynnt um börn sem köstuðu steinum í grunnskólabyggingu í austurbæ, en enginn var á vettvangi þegar lögregla kom á staðinn.
Einnig bárust tilkynningar um ölvaða veitingahúsgesti sem gátu ekki greitt fyrir mat sinn, brunalykt á stigagangi sem reyndist stafa af reykelsi, og mann sem var að róta í ruslagámum. Honum var vísað á brott af vettvangi.
Athugasemdir