Hin 29 ára gamla brasilíska Luana Lopes Lara, oft kölluð Luana Lopez, tölvunarfræðingur og frumkvöðull, hefur opinberlega tekið við titlinum sem yngsta konan heims sem hefur náð með sjálfdáðum að verða milljarðamæringur. Þessum áfanga náði Lara í kjölfar nýrrar fjármögnunarlotu spámarkaðsfyrirtækisins Kalshi, sem hún stofnaði ásamt viðskiptafélaga sínum árið 2018. Verðmæti fjármálatæknifyrirtækisins Kalshi, sem er með höfuðstöðvar í New York, rauk nýverið upp í 11 milljarða Bandaríkjadala eftir mikinn vöxt á alþjóðlegum mörkuðum samkvæmt Forbes.
Lara á sjálf um 12 prósenta hlut í fyrirtækinu og eru persónuleg auðæfi hennar nú metin á um 1,3 milljarða Bandaríkjadala, sem samsvarar tæpum 180 milljörðum íslenskra króna.
Með þessu veltir hún tæknifrumkvöðlinum Lucy Guo og tónlistarkonunni Taylor Swift úr sessi sem yngstu „sjálfsköpuðu“ kvenmilljarðamæringunum.
Óvenjuleg leið úr dansinum í fjármálaheiminn
Ferill Löru þykir með eindæmum óvenjulegur. Hún stundaði átta ára nám við ballettskóla Bolshoi-akademíunnar í Brasilíu og starfaði um tíma sem atvinnudansari í Evrópu áður en hún sneri sér að raunvísindum. Hún útskrifaðist með gráðu í tölvunarfræði frá hinum virta tækniháskóla MIT árið 2018, þar sem hún kynntist meðstofnanda sínum, Tarek Mansour.
Sögulegur sigur gegn bandaríska ríkinu
Kalshi starfrækir eftirlitsskylda kauphöll þar sem fjárfestar geta átt viðskipti og veðjað á útkomur raunverulegra atburða, svo sem efnahagsvísa, loftslagsmál og pólitík. Vöxtur fyrirtækisins tók gríðarlegt stökk eftir að Lara og Mansour unnu sögulegt dómsmál gegn bandaríska fjármálaeftirlitinu (CFTC). Dómstólar úrskurðuðu Kalshi í hag, sem heimilaði fyrirtækinu að bjóða upp á lögleg veðmál í kringum bandarísku forsetakosningarnar. Sú ákvörðun gjörbreytti landslagi spámarkaða og tryggði fyrirtækinu þá markaðsráðandi stöðu sem lagt hefur grunninn að milljarðavirði þess í dag.
Talsmenn Kalshi segja að nýja fjármögnunin muni nýtast til frekari tækniþróunar og landvinninga á evrópskum mörkuðum á komandi misserum.
Athugasemdir