Chris Tucker segist hafa verið skírlífur í rúm þrjú ár og að markmið hans sé að bíða með kynlíf þar til hann giftist. Leikarinn og grínistinn greindi frá þessu á uppistandssýningu sinni í Las Vegas á föstudagskvöld.
Samkvæmt heimildum sem voru viðstaddar sýninguna ræddi Tucker opinskátt um ástarlíf sitt og sagði áhorfendum að hann hefði verið skírlífur í þrjú ár. Hann bætti við að hann væri staðráðinn í að giftast og ætlaði að leggja áherslu á ástina næst þegar hann færi í samband.
Tucker sagði jafnframt að margir ættu erfitt með að trúa honum, þar á meðal fjölskyldumeðlimir hans. Hann sagði í gríni að frænka sín tryði á geimverur en ekki að hann hefði haldið sig frá kynlífi svo lengi.
Grínistinn sagði einnig frá viðbrögðum sem hann hefði fengið frá konum þegar hann útskýrði ákvörðun sína. Hann sagðist hafa lent í því að konur spyrðu hvort hann væri að „selja“ skírlífið sitt og svaraði því með húmor að hann væri ekki að selja neitt heldur einfaldlega að lifa samkvæmt ákvörðun sinni.
Eitt af vinsælustu atriðum kvöldsins var þegar Tucker grínaðist með að hann hefði orðið svo einmana að hann reyndi að daðra við gervigreindarforritin Siri og Alexa.
Tucker, sem er hvað þekktastur fyrir hlutverk sitt sem rannsóknarlögreglumaðurinn James Carter í kvikmyndaröðinni Rush Hour, sagði einnig að unnið væri að samningum vegna hugsanlegrar endurkomu hans í fjórðu mynd seríunnar, Rush Hour 4.
Athugasemdir