Lögreglan sinnti fjölmörgum útköllum og verkefnum í gærkvöldi og í nótt, þar á meðal vegna innbrota, eldsvoða, umferðarslysa og brota á umferðarlögum.
Tilkynnt var um innbrot í íbúðarhúsnæði og var grunaður aðili handtekinn og vistaður í fangaklefa. Þá var einnig tilkynnt um mann sem sást ráfa um í garði annars manns. Þegar lögregla hafði uppi á honum reyndist hann vera með ætlað þýfi og fíkniefni í fórum sínum og var hann handtekinn.
Tvær tilkynningar bárust um eld, annars vegar í auglýsingaskilti og hins vegar í geymslu. Ekki liggja fyrir upplýsingar um umfang tjóns í þeim málum.
Tvö umferðarslys voru tilkynnt. Í öðru þeirra lentu bifreið og rafmagnshlaupahjól í árekstri. Þá slasaðist einstaklingur á rafmagnshlaupahjóli eftir að hafa ekið á kyrrstætt hopphjól. Einnig var tilkynnt um ökumann sem hafði ekið á húsvegg.
Lögreglan hafði afskipti af fjölmörgum ökumönnum vegna gruns um akstur undir áhrifum áfengis eða fíkniefna. Alls voru sex ökumenn handteknir og fluttir á lögreglustöð vegna gruns um slíkan akstur. Þeir voru látnir lausir að lokinni blóðsýnatöku. Einn þeirra var jafnframt kærður fyrir að hafa ekki haft ökuskírteini meðferðis og í öðru tilviki kom í ljós að bifreið var ótryggð.
Þá var einn ökumaður handtekinn vegna gruns um sölu og dreifingu fíkniefna.
Nokkrir ökumenn voru kærðir fyrir umferðarlagabrot. Þar á meðal voru tveir kærðir fyrir akstur án gildra ökuréttinda og einn fyrir akstur án réttinda. Tveir ökumenn voru kærðir fyrir of hraðan akstur og að auki fyrir akstur á nagladekkjum eða án öryggisbeltis. Einn ökumaður var sérstaklega kærður fyrir akstur á nagladekkjum.
Lögregla aðstoðaði einnig leigubílstjóra vegna farþega sem neitaði að greiða fyrir akstur. Þá var ölvuðum og ógnandi manni gert að yfirgefa vettvang eftir afskipti lögreglu.
Meðal annarra verkefna voru tilkynningar um börn sem voru að skvetta málningu á húsvegg, sofandi mann á baðherbergi bensínstöðvar og tvö ökutæki sem boðuð voru í skoðun vegna ástands þeirra.
Athugasemdir