Lögreglan á höfuðborgarsvæðinu hafði í nógu að snúast í dag en meðal verkefna voru rannsóknir á tveimur alvarlegum líkamsárásarmálum, innbrotum, umferðarlagabrotum og fíkniefnaakstri.
Í hverfi 105 var tilkynnt um stórfellda líkamsárás þar sem þrír einstaklingar eru grunaðir um aðild. Málið er nú til rannsóknar hjá lögreglu. Einnig var tilkynnt um innbrot í geymslu í sama hverfi og er það mál sömuleiðis í rannsókn.
Þá var tilkynnt um innbrot í bifreið þar sem munum var stolið.
Í Laugardalnum var einn einstaklingur handtekinn fyrir brot á lögreglusamþykkt Reykjavíkurborgar. Þá var ökumaður kærður fyrir að aka bifreið um göngugötu.
Lögregla hafði einnig afskipti af tveimur ökumönnum sem grunaðir voru um akstur undir áhrifum fíkniefna. Báðir voru handteknir, færðir í blóðsýnatöku og síðar látnir lausir úr haldi á meðan rannsókn málanna heldur áfram.
Tilkynnt var um árekstur tveggja bifreiða en enginn slasaðist. Þá barst lögreglu tilkynning um hund sem hljóp yfir stofnbraut. Dýrið var hins vegar ekki sjáanlegt þegar lögreglumenn komu á vettvang.
Einn ökumaður var kærður eftir að hafa mælst á 64 kílómetra hraða þar sem hámarkshraði er 30 kílómetrar á klukkustund. Vegna alvarlegs hraðabrots var ökumaðurinn sviptur ökuréttindum til bráðabirgða.
Í Kópavogi var tilkynnt um þjófnað úr tveimur verslunum í sama verslunarkjarna. Leðurjakka var stolið úr annarri versluninni og skópörum úr hinni. Málið er til rannsóknar.
Lögregla stóð jafnframt fyrir ölvunareftirliti þar sem 143 ökumenn voru látnir blása í áfengismæli. Þrír ökumenn mældust með áfengi undir refsimörkum og einn þeirra var jafnframt kærður fyrir að nota ekki öryggisbelti.
Síðar var tilkynnt um slagsmál þar sem einn einstaklingur var handtekinn grunaður um stórfellda líkamsárás. Vegna rannsóknar málsins naut lögreglan á höfuðborgarsvæðinu aðstoðar sérsveitar ríkislögreglustjóra og var jafnframt beitt dróna við vettvangsvinnu, sem samkvæmt lögreglu skilaði góðum árangri við rannsókn málsins.
Athugasemdir