Þau sem óttuðust að úrslitaleikur heimsmeistaramótsins í knattspyrnu myndi snúast um fótbolta geta andað léttar. FIFA ætlar að lengja hálfleikinn í 20 til 25 mínútur svo nægt pláss verði fyrir stórtónleika í anda Super Bowl. Þetta kemur fram í frétt BBC.
Á meðan leikmenn reyna að halda sér heitum og þjálfarar koma taktík sinni á framfæri munu Madonna, Shakira og BTS sjá um að halda áhorfendum uppteknum. Sýningin sjálf á að taka um 11 mínútur, en með öllum tilheyrandi undirbúningi og tiltekt verður hálfleikurinn töluvert lengri en knattspyrnureglur gera ráð fyrir.
Samkvæmt reglum IFAB á hálfleikur ekki að vara lengur en 15 mínútur. Það virðist þó vera smáatriði þegar heimsstjörnur eru komnar á sviðið.
Þetta er ekki í fyrsta sinn sem FIFA teygir á hléinu. Í úrslitaleik heimsmeistaramóts félagsliða í fyrra stóð hálfleikurinn í 24 mínútur vegna tónlistarsýningar með Coldplay, Doja Cat og fleirum.
Justin Bieber bættist í síðustu viku við flytjendalistann og verður því nóg um dýrðir. Auk hans koma fram Burna Boy, Gustavo Dudamel, PS22 Chorus og Coldplay, en Chris Martin hefur sett saman dagskrána.
Ekki nóg með það. Áður en boltanum verður yfirhöfuð sparkað af stað verður vegleg lokahátíð þar sem meðal annars Tom Cruise, Robbie Williams, Nicole Scherzinger og Laura Pausini stíga á svið, auk þess sem Jennifer Hudson syngur bandaríska þjóðsönginn.
Þegar öllu þessu er lokið verður loksins hægt að spila sjálfan úrslitaleikinn.
Spánn hefur þegar tryggt sér sæti í úrslitunum og mætir annaðhvort Englandi eða Argentínu. En fyrst þarf auðvitað að komast í gegnum tónleikana.
Athugasemdir