Mason Haynes, breskur lífvörður sem starfaði um árabil fyrir Kardashian-Jenner-fjölskylduna, ökuþórinn Lewis Hamilton, tónlistarmanninn Charlie Puth og fleiri heimsþekkta einstaklinga, lést í umferðarslysi 4. júlí síðastliðinn. Hann var 52 ára gamall.
Frá þessu er greint á söfnunarsíðu sem stofnuð hefur verið til styrktar fjölskyldu hans.
„Sumir fara í gegnum lífið. Aðrir skilja eftir sig spor hjá öllum sem þeir hitta. Mason Haynes var einn af þessum sjaldgæfu og einstöku einstaklingum,“ segir í lýsingu söfnunarinnar.
Þar kemur einnig fram að Haynes hafi látist aðeins tveimur dögum fyrir 53 ára afmæli sitt.
„Líf Masons var tekið allt of snemma í hörmulegu umferðarslysi. Eftir sitja eiginkona hans Fay, dóttirin Brooke, sonurinn Noah, ástrík fjölskylda og óvenjustór hópur vina víðs vegar um heiminn.“
Haynes er lýst sem manni sem lét alla finna fyrir hlýju frá fyrstu kynnum.
„Hann var maður sem lét fólk finna sig velkomið frá fyrstu stundu, sem ferðaðist milli landa til að hjálpa vini og brást aldrei þeim sem stóðu honum nærri.“
Í lýsingunni er honum einnig lýst sem verndara, leiðbeinanda og húmorista með stórt hjarta.
Vinnuveitandi hans, Trojan Security UK, heiðraði minningu hans í færslu á Instagram þar sem birt var mynd af Haynes ásamt Kris Jenner.
„Við viljum heiðra sannkallaða goðsögn í heimi lífvarða. Stóri Mason. Farinn allt of snemma. Hvíl í friði, bróðir.“
Eftir háskólanám ákvað Haynes að starfa við öryggisgæslu og sérhæfði sig í svokallaðri nándarvernd fyrir þekkta einstaklinga. Hann gætti meðal annars öryggis Kim Kardashian, Kris Jenner, Kendall Jenner, Kanye West, Kevin Hart, Charlie Puth, Lewis Hamilton og Nicki Minaj.
Í viðtali árið 2018 sagði hann að eitt eftirminnilegasta atvikið á ferlinum hefði verið ránið á Kim Kardashian í París árið 2016.
„Augljósasta dæmið er ránið á Kim Kardashian í París. Ég get ekki farið nánar út í það, en ég var hluti af því teymi. Þetta voru einfaldlega óheppilegar aðstæður sem leiddu til þess að eitthvað mjög slæmt gerðist,“ sagði Haynes þá.
Athugasemdir