Mennta- og barnamálaráðuneytið hefur birt ný drög að frumvarpi til breytinga á barnaverndarlögum í Samráðsgátt stjórnvalda. Frumvarpið kveður á um sögulegar breytingar á útivistartíma barna, en reglurnar hafa að meginstefnu til staðið óbreyttar síðan árið 1992.
Mesta breytingin lýtur að útivistartíma barna á aldrinum 10 til 12 ára yfir vetrartímann. Samkvæmt tillögunni verður þeim heimilt að vera á almannafæri til klukkan 21.00 án fylgdar fullorðinna, sem er lenging um eina klukkustund frá núgildandi lögum. Fyrir börn níu ára og yngri verður miðað við klukkan 20.00 og reglur fyrir 13 til 16 ára verða áfram óbreyttar við klukkan 22.00.
Auk þess er lagt til að sumartími reglnanna hliðrist og gildi frá 1. júní til 1. september, í stað þess að hefjast 1. maí eins og verið hefur. Markmið ráðuneytisins með þeirri breytingu er að tengja útivistartímann með skýrari hætti við skólaárið. Undantekningar munu áfram gilda ef börn eru á heimleið frá viðurkenndu skóla-, íþrótta- eða frístundastarfi.
Efni þetta var upphaflega hluti af stærra heildarlagafrumvarpi um barnavernd á Alþingi en er nú lagt fram sérstaklega í samræmi við nefndarálit meiri hluta velferðarnefndar. Við gerð frumvarpsins var sérstakt tillit tekið til sjónarmiða barna sjálfra um aukinn sveigjanleika og samveru, samhliða ríkum forvarnarsjónarmiðum.
Stjórnvöld hvetja börn, foreldra, fagfólk og aðra hagaðila til að kynna sér efnið og senda inn umsagnir. Umsagnarfrestur í Samráðsgáttinni er til og með 28. ágúst næstkomandi.
Breytingar á útivistartíma
- 10–12 ára: Útivistartími lengist um eina klukkustund, frá 20:00 til 21:00 á veturna.
- 9 ára og yngri: Útivistartími verður miðaður við klukkan 20:00 á veturna.
- 13–16 ára: Útivistartími helst óbreyttur og verður áfram til klukkan 22:00 á veturna.
Athugasemdir