Japanski knattspyrnumaðurinn Kazuyoshi Miura, elsti starfandi atvinnumaður heims í knattspyrnu, skoraði um helgina sitt fyrsta keppnismark í tæp fjögur ár. Miura er 59 ára gamall og verður sextugur í febrúar á næsta ári.
Miura, sem er á láni hjá japanska C-deildarfélaginu Fukushima United frá Yokohama FC, skoraði fimmta mark liðsins í 7-0 sigri á Iwaki Furukawa í keppni um Keisarabikarinn á laugardag.
Þetta var fyrsta mark hans síðan í nóvember 2022 þegar hann skoraði fyrir Suzuka PG gegn Osaka.
„Ég vildi standa undir væntingum allra, þar á meðal þjálfarans sem gaf mér tækifæri til að spila,“ sagði Miura eftir leikinn, en hann var bæði í byrjunarliðinu og fyrirliði Fukushima United.
Hann sagðist hafa orðið sérstaklega glaður yfir því hvernig leikmenn, þjálfarar og stuðningsmenn fögnuðu markinu, þrátt fyrir að liðið hefði þegar náð öruggri forystu.
Miura, sem gengur gjarnan undir viðurnefninu „King Kazu“, framlengdi nýverið lánssamning sinn við Fukushima United til júní 2027. Hann er nú á sínu 42. tímabili sem atvinnumaður í knattspyrnu.
Hann hóf atvinnumannaferil sinn árið 1986 með brasilíska félaginu Santos og hefur síðan leikið með 17 félögum, meðal annars á Ítalíu, í Króatíu, Ástralíu og Portúgal.
Fyrir japanska landsliðið lék Miura 89 landsleiki, skoraði 55 mörk og lagði landsliðsskóna á hilluna árið 2000.
Athugasemdir