Hjón fundust myrt eftir að ICE vísaði eiginmanninum úr Bandaríkjunum

Hjón sem nýlega höfðu sam­ein­ast á ný í Gvatemala eftir að eig­in­mann­inum var vísað úr Banda­ríkj­unum fund­ust bundin og skotin til bana á syk­ur­reyrsakri. Eins árs dóttir þeirra fannst á lífi við hlið þeirra.

Nixon Giovanni Pérez Paz, 43 ára, og eig­in­kona hans, Glendy Marisol González de la Cruz, 25 ára, fund­ust látin skammt frá borg­inni Retal­huleu í suð­vest­ur­hluta Gvatemala.

Pérez Paz var vísað úr Banda­ríkj­unum af banda­rískum útlend­inga­yf­ir­völdum (ICE). Eig­in­kona hans varð eftir í Missouri þar sem hún ól yngstu dóttur þeirra í júní 2025 og vann tvö lík­am­lega erfið störf sam­hliða því að ala upp þrjár dætur þeirra.

Samkvæmt sam­tök­unum Fuerza, sem berj­ast fyrir rétt­indum inn­flytj­enda í St. Louis, urðu fjár­hags­erf­ið­leikar og ótti við að hún yrði sjálf hand­tekin og aðskilin frá börnum sínum, þrátt fyrir að eiga hæl­is­um­sókn í vinnslu, til þess að hún ákvað að snúa aftur til Gvatemala til að sam­ein­ast eig­in­manni sínum.

Hjónin höfðu aðeins verið saman á ný í nokkrar vikur þegar þau voru myrt.

Lög­reglan í Gvatemala segir að þau hafi fund­ist með hendur bundnar fyrir aftan bak. Pérez Paz var með skotsár á hálsi en González de la Cruz með skotsár á höfði. Á vett­vangi fund­ust einnig skot­hylki, skór og mót­or­hjól.

Sak­sókn­ar­yf­ir­völd í Gvatemala segja að dætrum hjón­anna þriggja hafi verið komið í umsjá ætt­ingja eftir morðin. Rannsókn máls­ins stendur yfir og hafa hvorki grun­aðir né hugs­an­legur hvati verið gerðir opin­berir.

Bróðir hins látna, Rolando Pérez Paz, sagði að Nixon hefði verið hand­tek­inn af útlend­inga­yf­ir­völdum á leið til vinnu í fyrra. Tals­maður ICE stað­festi að hann hefði verið hand­tek­inn vegna ólög­mætrar dvalar í Banda­ríkj­unum.

„Mér fannst eins og þeir hefðu tekið frá mér það sem skipti mig mestu máli,“ sagði Rolando í sam­tali við St. Louis Public Radio.

Hann bætti við:

„Ef útlend­inga­yf­ir­völd hefðu ekki hand­tekið bróður minn væri mág­kona mín enn á lífi og börnin þyrftu ekki að ganga í gegnum þessa sorg. Því miður sér banda­ríska rík­is­stjórnin það ekki. Það skiptir hana engu máli.“

Borg­ar­stjóri Overland í Missouri, Marty Little, sagði að sveit­ar­fé­lagið hefði hvorki verið upp­lýst fyr­ir­fram né eftir aðgerðir útlend­inga­yf­ir­valda sem leiddu til hand­töku Pérez Paz.

Hann sagði að ótil­kynntar aðgerðir alrík­is­yf­ir­valda gætu skapað örygg­is­á­hættu þar sem lög­regla á staðnum vissi ekki að slíkar aðgerðir færu fram.

Fyr­ir­hugað er að halda kertafleyt­ingu til minn­ingar um hjónin fyrir utan ráð­hús Overland þann 2. ágúst.