Bandaríska TikTok-stjarnan Sydney Towle hefur verið flutt á líknardeild eftir þriggja ára baráttu við sjaldgæft krabbamein í gallgöngum. Frá þessu greindi bróðir hennar, Austin Towle, á samfélagsmiðlum.
„Sydney hefur verið flutt á líknardeild og er umkringd vinum og fjölskyldu,“ skrifaði hann við mynd sem sýnir fjölskylduna saman á sjúkrahúsinu.
Líknarmeðferð er veitt þegar lækning er ekki lengur talin möguleg og áherslan er lögð á að lina einkenni og bæta lífsgæði sjúklings.
Austin þakkaði jafnframt fyrir þann mikla stuðning sem systir hans hefur fengið.
„Takk öll. Ást ykkar og stuðningur fara ekki fram hjá okkur,“ skrifaði hann.
Aðeins tveimur vikum áður hafði Towle, sem er 26 ára gömul og með yfir 1,1 milljón fylgjenda á TikTok, sagt frá næsta áfanga í tilraunameðferð sinni gegn krabbameininu. Hún viðurkenndi að hafa verið lítið virk á samfélagsmiðlum vegna erfiðrar meðferðar og mikilla verkja.
„Það er skrýtið að heyra sjálfa mig tala því mér líður eins og allt annarri manneskju. Ég hef verið á svo miklum verkjalyfjum og öðru slíku,“ sagði hún í myndbandi sem hún tók upp af sjúkrarúmi sínu.
Hún lýsti því að hver dagur væri afar erfiður.
„Ég ætla ekki að ljúga, hver einasti dagur er gríðarlega krefjandi vegna verkjanna sem ég finn stöðugt fyrir. En ég hef von um að ég geti komist í gegnum þetta.“
Towle sagði jafnframt að hún tæki einn dag í einu.
„Ég tek bara einn dag í einu. Bara halda áfram að synda. Ég er einfaldlega þakklát fyrir að vera hér.“
Hún viðurkenndi einnig að langvarandi sjúkrahúsdvöl hefði verið einmanaleg.
„Stundum er þetta svo einmanalegt því enginn annar er hér til lengdar. Fólk kemur í nokkra daga en ég er hér á hverjum degi. Ég reyni að heilsa öllum sem ég hitti og ég á fullt af bangsadýrum og teikningum frá fólki sem hefur komið í heimsókn.“
Í viðtali árið 2025 sagði Towle að það erfiðasta við veikindin hefði verið að greinast svona ung.
„Það var mjög erfitt að horfa á vini mína fara út að borða og lifa lífinu á meðan ég gat suma daga ekki einu sinni farið út úr húsi. Krabbameinslyfjameðferð breytir manni, maður er síþreyttur og allt fer úr skorðum. Mér fannst eins og líf mitt hefði verið sett á bið á meðan líf allra annarra hélt áfram.“
Hún sagði þó að stuðningur fylgjenda sinna hefði gefið sér styrk.
„Það sem hefur haldið mér gangandi er fólkið sem sendir mér skilaboð eða kemur til mín og segir: „Þú hefur hjálpað mér svo mikið.“ Að vita að það skiptir máli að vera opinská og heiðarleg um krabbamein hefur gefið mér ótrúlega mikið.“
Athugasemdir