Saksóknarar í Clearfield-sýslu í Pennsylvaníu í Bandaríkjunum hafa gefið út 5.538 ákæruliði á hendur hinum 37 ára gamla Nicholas Allen Spencer. Er hann sakaður um að hafa nýtt sér stúlku kynferðislega nánast daglega á nokkurra ára tímabili. Talið er að um sé að ræða mesta fjölda sakargifta í einu sakamáli í sögu fylkisins.
Tæplega 4.000 af ákæruliðunum varða alvarlegustu tegund afbrota. Þar á meðal eru ákærur fyrir nauðgun, nauðgunartilraunir, kynferðisbrot gegn ólögráða einstaklingi og gróft kynferðisofbeldi án samþykkis.
Samkvæmt gögnum lögreglu greindi fórnarlambið, sem nú er undir 16 ára aldri, frá því að ofbeldið hefði hafist þegar hún var um tólf ára gömul. Hann hætti ekki að brjóta á henni fyrr en vinkona stúlkunnar hvatti hana til að tilkynna málið til yfirvalda.
Tami Fees, aðstoðarsaksóknari í Clearfield-sýslu, staðfesti í samtali við fjölmiðla að málið væri það stærsta í sögu sýslunnar og líklega fylkisins. Hún lýsti því yfir að embættið stefndi að því að tryggja að Spencer verði dæmdur í lífstíðarfangelsi vegna alvarleika brotanna.
Spencer var handtekinn á þriðjudag og er nú í haldi í Clearfield-sýslufangelsinu þar sem hann bíður fyrsta dómþings, sem áætlað er að fari fram mánudaginn 12. ágúst næstkomandi.
Athugasemdir